आयच्यान चार दीस आयुर्वेद काँग्रेस परिशद

भांगरभूंय | प्रतिनिधी

60 देशांतल्या 5 हजार प्रतिनिधींची हाजेरी

पणजी : संवसारातलीं सगल्यांत व्हड णवी आयुर्वेद काँग्रेस परिशद आयज सावन गोंयांत पणजे सुरू जाता. केंद्रीय आयुष मंत्री सर्बानंद सोनोवाल, केंद्रीय मंत्री श्रीपाद नायक, मुख्यमंत्री डॉ. प्रमोद सावंत, भलायकी मंत्री विश्वजीत राणे हांचे सयत हेर मानेस्तांची उक्तावण सुवाळ्याक हाजेरी आसतली. कांपाल मैदानाचेर सकाळीं 10 वराचेर उक्तावण जातलें. आयतारा जावपी समारोपाचे कार्यावळीक प्रधानमंत्री नरेंद्र मोदी हाजीर रावतले.
आयुर्वेद काँग्रेसीक 60 देशांतले 5 हजारां वयर प्रतिनिधी हाजीर रावपाचे आसात, अशी म्हायती आयुर्वेद काँग्रेसीचे महासचीव अनुप ठाकूर हांणी पत्रकार परिशदेंत दिली. पत्रकार परिशदेक आयुष मंत्रालयाचे आशुतोष श्रीवास्तव, डॉ. रवी नारायण आचार्य, सुनील कुमार हाजीर आशिल्ले. उक्तावणाचे कार्यावळीक मंत्री गोविंद गावडे, केंद्रीय आयुष राज्य मंत्री डॉ. महेंद्र मंजुपारा तशेंच राज्यांचे आयुष मंत्री हाजीर रावतले. बिरेस्तार ते आयतार मेरेन परिशद चलतली.
आयुर्वेद काँग्रेस परिशदे वेळार आयुर्वेद ओपीडी चलतली. हातूंत फुकट आयुर्वेद उपचार जातले. नाडी परिक्षा, ईएनटी, फर्टिलिटी हाचेर उपचार जातले. आयुर्वेद उपचारांचो सगल्या गोंयकारांनी लाव घेवचो, अशें आवाहन मुख्यमंत्री डॉ. प्रमोद सावंत हांणी केलां.
आयुर्वेद विज्ञान तशेंच आयुर्वेद उपचार पद्दतीचेर स परिसंवाद जातले. आयुर्वेद चित्रपटांचेर आदारीत सर्त जातली. सर्ती खातीर 52 प्रवेशिका आयल्यात. आयुर्वेदीक शास्त्रांत ज्योतिष शास्त्र आसा. आयुर्वेद ज्योतिषाचेर परिसंवाद जातलो. मनशा सयत गोरवांचेर लेगीत आयुर्वेद उपचार जातात. पशु आयुर्वेद उपचाराचेर परिसंवाद जातलो. प्रधानमंत्री नरेंद्र मोदी हांची संवसारीक प्रतिनिधीं कडेन आयतारा चर्चा जातली.
दक्षीण पूर्व भागांतल्या आयुर्वेद संस्थांची बसका जातली. देशांत जितली आयुर्वेद म्हाविद्यालयां आसात, त्या सगल्यांचे प्राचार्य, तेच प्रमाण संवसारांतले आयुर्वेद वखदांचे उत्पादक तशेंच विक्रेते परिशदेक हाजीर आसतले. आयुर्वेद एक्स्पोंत 200 परस चड स्टॉलां आसतली. आयुर्वेद वखदां तशेंच उत्पादनां पळोवपाची संंद मेळटली. उत्पादक, विक्रेते, वितरक हांची परिशद जातली. आयुर्वेदांत नव्यो उपचार पद्दती तशेंच नव्या सोदांचेर चर्चा जातली. एकेच माचयेर आयुर्वेदा संबंदी सगल्या विशयांचेर मार्गदर्शन तशेंच चर्चा जातली.
समारोपा वेळार प्रधानमंत्री नरेंद्र मोदी हांचें हस्तुकीं धारगळचे आयुष हॉस्पिटल, दिल्ली होमिओपथी संस्था तशेच युनानी मेडीसीन, गाजियाबाद हांचें व्हर्च्युअल पद्दतीन उक्तावण जातले. गोंयांत आयुर्वेदाच्या विस्ताराक बरोच वाव आसा. आयुर्वेदांत गुंतवणूक वाडली जाल्यार पर्यटन तशेंच रोजगारांत वाड जातली.