भांगरभूंय | प्रतिनिधी
वाळपय, प्रतिनिधी : सत्तरी म्हालांतल्या वेळूस आनी म्हादय न्हंयांच्या उदकाची पातळी उणी जावपाक लागल्या. हाका लागून शिंपणावळ खात्याचे येवजणेचेर परिणाम जाला. जायत्या सुवातींनी शिंपणावळी खातीर उदकाचो उणाव जाला. शेतकी आनी बागायतीचेर ताचो परिणाम जावपाची शक्यताय शेतकारांनी उक्तायल्या. सध्या शिंपणावळ खात्याच्या अधिकार्यांनी हे खातीर धांवपळ करपाक सुरू केलां. खुबशे कडेन पंपांक उदकाची पुरवण करपाक प्रवाहाक वाट मेकळी करून दिल्ल्याचें चित्र पळोवपाक मेळटा.
हे विशीं म्हायती अशी, सत्तरी म्हालांतली लाखांनी चौरस मिटर जमीन उदका खाला आयल्या. शिंपणावळ खात्यान बंधारो येवजण राबयले उपरांत खुबशे कडेन पडींग आशिल्ल्या जमनींचेर लागवड करपाक सुरवात जाली. उपसा येवजणे वरवीं हे लागवडीक उदकाची पुरवण करता. हातूंत सत्तरी म्हालांतल्या म्हादय, रगाडा, वेळूस, वाळवंटी ह्या न्हंयांचो आसपाव आसा. ह्या तिनूय न्हंयांचेर बंधारे बांदल्यात. हातूंतल्यान उदकाची पुरवण जाता. हो उदकाचो सांठो उपसा येवजणे वरवीं शेतकरी जमनींक दितात.
पावसाच्या उदकाचो सांठो
मजगतीं, पावस सोंपल्या उपरांत बंधार्यांच्यो फळयो घालून उदकाचो सांठो आडायतात. तातूंत व्हडा प्रमाणांत उदकाचो सांठो करतात. हो उदकाचो सांठो शिंपणावळ खात्याच्या उपसा येवजणे वरवीं शेतकार भावांच्या जमनींक पुरवण करतात. लाखांनी लिटर उदकाचो सांठा केल्या उपरांत हाचो फायदो शेतकारांक बरे तरेन जायत आसता.
न्हंयच्या उदकाची पातळी देंवली
सत्तरी म्हालांतल्या कांय न्हंयांतल्या उदकाची पातळी देवल्या अशी म्हायती मेळ्ळ्या. हाचे वायट परिणाम शिंपणावळ खात्याच्या उपसा येवजणेचेर जाल्यात. म्हत्वाचें म्हळ्यार वेळूस आनी म्हादय ह्या दोनूय न्हंयांची पातळी देंवल्या. वेळूस हांगा आशिल्ल्यो जायत्यो येवजण्यो आतां पुराय वेळ चलनात. हाचें कारण तांकां जाय तितलो उदकाचो सांठो मेळना. हाका लागून ह्या शेतकार भावांक समाधानी उदकाची पुरवण जायत आसता. हाचे सध्या परिणाम जाला. ताका लागून फुडलो एक म्हयनो शेती, बागायतीचेर वायट परिणाम जावपाक शकता. न्हंयांची पातळी देंविल्ल्यान उपसा येवजणेच्या पंपांक जाय तितलें उदक येना. ताका लागून सध्या शिंपणावळ खातें विंगड विंगड पांवड्यार ही येवजण बंद पडची न्हय म्हणून धांवपळ करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
