भांगरभूंय | प्रतिनिधी
लंडन, खबरां संस्था: ब्रिटीश वखदां कंपनी AstraZeneca हांणी आपल्या कोराना लसीचे वायट परिणाम जावपाक शकतात हें मान्य केलां. ब्रिटीश मिडिया टेलिग्राफाच्या अहवाला प्रमाण, एस्ट्राझेनेकाचे लसीचेर जायत्या जाणांक मरण आयिल्ल्याचो आरोप आसा. हेर जायत्या जाणांक गंभीर दुयेंसां भोगचीं पडलीं.
AstraZeneca लशीक भारतांत Covishield म्हणून वळखतात. ब्रिटीश उच्च न्यायालयांत सादर केल्ल्या कागदपत्रांनी, कंपनीन मान्य केलां, तांच्या कोरोना लसीक लागून थ्रोम्बोसिस थ्रोम्बोसाइटोपेनिया सिंड्रोम वा टीटीएस जावपाक शकता. ह्या रोगाक लागून कुडींत रगताचे गुळे तयार जातात आनी प्लेटलेटांचो आंकडो उणो जाता. तशेंच काळजाचो आताक आनी स्ट्रोक येवपाचोय धोको वाडटा. उच्च न्यायालयांत कंपनी आड ५१ प्रकरणां प्रलंबीत आसात. बळी पडपी लोकांनी एस्ट्राझेनेका कडल्यान सुमार एक हजार कोटी रुपयांची भरपाय मागल्या.
कंपनीन दुश्परिणाम मान्य केल्यात
फाटल्या वर्सा स्कॉटान एस्ट्राझेनेका आड कागाळ दाखल केल्ली. मे २०२३ वर्सा स्कॉटाच्या आरोपांक जाप दितना कंपनीन तांची लसींतल्यान टीटीएस जावंक शकना असो दावो केल्लो. पूण अंदूं फेब्रुवारींत उच्च न्यायालयांत दाखल केल्ल्या कायदेशीर कागदपत्रांत कंपनीन हो दावो फाटीं घेतलो.
कांय प्रकरणांनी तांचे लसीक लागून टीटीएस जावपाक शकता अशें ऍस्ट्राझेनेकान बरयलां. पूण सध्या कंपनी कडेन ह्या लसींत हो रोग कित्याक लागून जाता हाची म्हायती ना. हीं कागदपत्रां मुखार आयले उपरांत स्कॉटाच्या वकिलान न्यायालयांत एस्ट्राझेनेका-ऑक्सफर्ड लसींत त्रुटी आसात आनी ताच्या परिणामा विशीं चुकीची म्हायती दिल्या असो दावो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
