भांगरभूंय | प्रतिनिधी
पणजी : तिसर्या टप्प्यांत जावपी लोकसभा वेंचणुकेंत ३९२ कोटी उमेदवारांनी वेंचणुकेच्या मळार प्रवेश केला. हातूंत दक्षीण गोंय मतदारसंघांतल्यान भाजपा उमेदवार पल्लवी धेंपे हांचो सगळ्यांत गिरेस्त उमेदवार म्हूण उल्लेख केला. असोसिएशन फॉर डेमोक्रॅटीक रिफॉर्म्स (ADR) च्या अहवाला प्रमाण तांची संपत १,३६१ कोटी रुपयां परस चड आसा.
मजगतीं, पांच उमेदवार अशेय आसात जाचे कडेन कसलीच मालमत्ता ना. ते म्हळ्यार कोल्हापुरांतले अपक्ष उमेदवार इराफान अबुतालीब चांद, जांची संपत १०० रुपया आनी गुजरातच्या बारडोली हांगाचे बसपा उमेदवार, जांची मालमत्ता फकत २,००० रुपया आसा. तशेंच मोदींच्या नेतृत्वा खाला एनडीए सरकारांतले केंद्रीय नागरी उड्डाण मंत्री ज्योतिरादित्य एम. सिंधिया हांची संपत ४२४ कोटी रुपयां परस चड आसा. ते मध्य प्रदेशांतल्या गुना मतदारसंघांतल्यान वेंचणूक लढटा. मजगतीं, कॉंग्रेसीचे तिकेटीचेरर महाराष्ट्राच्या कोल्हापूर मतदारसंघाचें प्रतिनिधित्व करपी छत्रपती शाहू शाहजी हांची सञपत ३४२ कोटीं परस चड आसा.
एडीआर आनी नॅशनल इलेक्शन वॉचान केल्ल्या विश्लेशणांत १२ राज्यां आनी केंद्रशासीत प्रदेशांत तिसर्या टप्प्यांत मतदान जाता. ह्या वेंचणूक लढोवपी १३५१ उमेदवारांच्या स्व-शपथपत्रांची छाननी केली. ह्या उमेदवारां मदीं ३९२ (२९ टक्के) कोट्याधीश आसात.
मुखेल पक्षां मदीं जेडीयूचे ३ मदले १०० टक्के उमेदवार, शिवसेना (उद्धव बाळासायब ठाकरे) ५ मदले सगळे ५ उमेदवार, एनसीपी ३ मदले सगळे ३ उमेदवार, आरजेडी ३ मदले सगळे ३ उमेदवार, शिवसेनेच्या २ मदले २ उमेदवार, राष्ट्रवादी कॉंग्रेसीच्या शरद पवार गटाचे ३ मदले सगळे ३ उमेदवार, भाजप ८२ मदले ९४ टक्के उमेदवार, कॉंग्रेसीचे ६८ मदले ८८ टक्के, सपाचे १० मदले ९० टक्के उमेदवार आनी एआयटीसी हांचे ६७ टक्के उमेदवारांची मालमत्ता १ कोटीञ परस चड आसा.
मजगतीं, भाजपांतल्या कोट्याधीश उमेदवारांचो आंकडो सगळ्यांत चड आसा. ८२ मदल्या ७७ उमेदवारांनी (९४%) १ कोटी रुपयां परस चड संपत जाहीर केल्या. तिसर्या टप्प्यांत दरेक उमेदवार सरासरी मालमत्ता ५.६६ कोटी रुपया आसा.
राष्ट्रवादी कॉंग्रेस पक्ष (शरदचंद्र पवार) हांच्या उमेदवारांची मेळून सगळ्यांत चड ८९.६८ कोटी मालमत्ता आसा. ताचे फाटल्यान राष्ट्रवादीच्या उमेदवारांची ६२.६४ कोटी रुपया आसा.
तिसर्या टप्प्यांतलें मतदान ७ मेक जावपाचें आसा. ह्या टप्प्यांत १२ राज्यां आनी केंद्रशासीत प्रदेशां मदल्या ९४ लोकसभा मतदारसंघांचो आसपाव आसा. ह्या टप्प्यांतल्या जागां खातीर वट्ट १,३५१ उमेदवार वेंचणुकेक देंवल्यात. विशेश म्हळ्यार, गुजरातांतल्या सुरत पीसींतल्यान एका उमेदवारान विरोधा विणें जैत मेळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
