भांगरभूंय | प्रतिनिधी
दुबय, खबरां संस्था: दुबय संवसारांतलो सगळ्यांत व्हडलो विमानतळ बांदतले. अल जझिरा खबरां चॅनलाच्या म्हणण्या प्रमाण, तें बांदपाक ३५ अब्ज डॉलर म्हणल्यार सुमार २.९२ लाख कोटी रुपया खर्च येतलो. दुबयचे प्रधानमंत्री शेख मोहम्मद बिन राशिद अल मकतूम हांणी सोशल मिडियाचेर ही म्हायती दिल्या.
दुबय आंतरराष्ट्रीय विमानतळा परस हो नवो विमानतळ ५ पटीन व्हड आसतलो, अशें तांणी सांगलें. हांगाच्यान दर वर्सा २६ कोटी प्रवासी प्रवास करतले. दुबयच्या अल मकतूम आंतरराष्ट्रीय विमानतळा वयल्यान हो प्रकल्प सुरू जातलो. ५ समांतर रनवे आसतले, म्हणल्यार हांगाच्यान एकाच वेळार ५ विमानां उडपाक वा देंवपाक शकतलीं. हाचे भायर विमानतळार ४०० टर्मिनल गेट आसतल्यो.
१० वर्सांनी अल मकतूम विमानतळ तयार जातलो
नव्या विमानतळाच्या डिझायनाक मान्यताय मेळ्ळ्या अशें प्रधानमंत्री मकतूम हांणी सांगलें. ह्या विमानतळाचें वट्ट क्षेत्रफळ ७० चौखण किमी. आसतलें. फुडल्या १० वर्सांत तें बांदपाची येवजण आसा. हो प्रकल्प पुराय जाले उपरांत दुबय आंतरराष्ट्रीय विमानतळाचें काम नव्या अल मकतूम विमानतळार हस्तांतरीत करतले.
ह्या प्रकल्पा खाला दुबयच्या विमानतळा वांगडा थंयच्या भोंवतणचें पुराय शार बांदतले. हाचे वांगडाच १० लाख लोकांक घरां बांदपाच्या प्रकल्पाचें कामय पुराय जातलें. दुबय विमानतळ हो सद्या संवसारांतलो सगळ्यांत चड व्यस्त आंतरराश्ट्रीय विमानतळ आसा. २०२२ वर्सा सुमार ६.६ कोटी प्रवासी ह्या विमानतळा वयल्यान गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
