भांगरभूंय | प्रतिनिधी
राज्याच्या राजकारणांतूच रावपा कडेन गोंयच्या फुडार्यांचो कल
पणजी,प्रतिनिधी : राज्यांत बरेच खेपो विधानसभा वेंचणूक जिकून बरोच तेंप आमदार वा मंत्री जाल्ले जायते फुडारी आसात. पक्षान विधानसभा वेंचणुकेची उमेदवारी न्हयकारली म्हणून खुबश्या जाणांनी हेर पक्षांत प्रवेश करुन वा अपक्ष म्हूण वेंचणूक लडोपाचे प्रकार घडल्यात. लोकसभा वेंचणुकेचो विचार केल्यार उमेदवारी खातीर बंड करपा सारके प्रकार घडूंक ना. मात पक्षान सादर केल्लो उमेदवारीचो प्रस्ताव न्हयकारपाचे प्रकार घडल्यात. हे खेपो भाजपाचे वेंचणुक समितीन दक्षीण गोंयां खातीर हेर नांवां सयत दिगंबर कामत हांच्या नांवाचीय शिफारस केल्ली. मात दिगंबर कामत हे पयलीच उमेदवारीचे सर्तींतल्यान फांटी सरले. २००४ आनी २००९ वर्सा कॉंग्रेसीक उत्तर गोंय मतदारसंघा खातीर उमेदवारूच मेळूंक नाशिल्लो. सांगपाचें तात्पर्य म्हळ्यार गोंयच्या चडशा फुडार्यांची पसंती राष्ट्रीय राजकारणा परस राज्याच्या राजकारणाकूच आसा.
आदले मुख्यमंत्री प्रतापसिंग राणे हे आता निवृत्त जाले तरी बरोच तेंप ते राजकारणांत आशिल्ले. मुख्यमंत्री, विरोधी पक्ष फुडारी, सभापती अशीं जायतीं पदां तांणी भुशयल्यांत. तरी तांणी केन्नाच लोकसभा वेंचणूक लडोवंक ना.
पयले मुख्यमंत्री सर्गेस्त भाऊसायब बांदोडकार, सर्गेस्त शशिकला काकोडकार, सर्गेस्त बाबू नायक, सर्गेस्त डॉ. लुईस प्रोत बार्बोजा, सर्गेस्त शेख हसन अरूण, सर्गेस्त फ्रांसिस डिसोजा, लुईझिन फालेरो, प्रा. लक्ष्मीकांत पार्सेकार, दयानंद मांद्रेकार हांणीय लोकसभा वेंचणूक लडोवंक ना.
सध्याच्या विधानसभेंतले मंत्री सुभाष शिरोडकार, माविन गुदिन्हो, बाबूश मोन्सेरात, अलेक्स सिकेरा, मगोचे सुदीन ढवळीकार, दिगंबर कामत, विश्वजीत राणे हे चार परस चड खेपो आमदार म्हुण वेंचून आयल्यात. मात कोणेंच आजून लोकसभा वेंचणुक लडोवंक ना.
कॉंग्रेसीचे उत्तर गोंय उमेदवार आनी आदले केंद्रीय मंत्री रमाकांत खलप, रवी नायक, फ्रांसिस सार्दीन हांणी पयली विधानसभा वेंचणुकेंत अपेस आयले उपरांत लोकसभा वेंचणुक लडयल्ली.
आदले मुख्यमंत्री सर्गेस्त मनोहर पर्रिकार, डॉ. विल्फ्रेड डिसोजा, जितेंद्र देशप्रभू, डॉ. काशीनाथ जल्मी, दयानंद नार्वेकार हांणी मात लोकसभा वेंचणुक लडयल्या. मात तें हारले.
लोकसभा वेंचणुक लडोवंक नाशिल्ले आदले फुडारी (जिवीत नाशिल्ले)
– भाऊसायब बांदोडकार (पयले मुख्यमंत्री) शशिकला काकोडकार (आदली मुख्यमंत्री)
_ जॅक सिकेरा (युगो फुडारी)
_ डॉ. लुईस प्रोत बार्बोजा (आदले मुख्यमंत्री)
_ बाबू नायक, शेख हसन अरुण, फ्रांसीस डिसोजा (बरेच खेपो आमदार, मंत्री)
लोकसभा वेंचणूक लडोवंक नाशिल्ले फुडारी (जिवीत आशिल्ले)
– लुइझीन फालेरो (आदले मुख्यमंत्री)
– प्रा. लक्ष्मीकांत पार्सेकार (आदले मुख्यमंत्री)
– दयानंद मांद्रेकार (४ खेपो भाजप आमदार)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
