भांगरभूंय | प्रतिनिधी
नवी दिल्ली, खबरां संस्था: सर्वोच्च न्यायालयान १४ वर्सां पिरायेचे बलात्कार पिडेस्ताक गुरुवारपणाच्या ३० व्या सप्तकांत अबॉर्शन करपाची परवानगी दिवपी निर्णय रद्द केला. न्यायालयान २२ एप्रिलाक चलयेचें अबॉर्शन करपाची परवानगी दिल्ली.
चलयेच्या आवय- बापायचे विनवणे उपरांत न्यायालयान हो निर्णय रद्द केलो. अशें केल्यार चलयेचो जीव धोक्यांत पडूं येता अशें चलयेच्या आवय- बापायन सांगलें. भुरग्याची जतनाय घेवपाक आमी तयार आसात अशेंय तांणी सांगलें. व्हिडिओ कॉन्फरन्सिंगा वरवीं पालकां कडेन उलयले उपरांत सरन्यायाधीश डीवाय चंद्रचूड हांणी भुरग्याचें कल्याण सगळ्यांत म्हत्वाचें अशें सांगलें.
२२ एप्रिलाक सर्वोच्च न्यायालयान मुंबयच्या लोकमान्य टिळक हॉस्पिटलांत बेगोबेग गर्भपाताची वेवस्था करपाचो आदेश दिल्लो. तो दितना मुखेल न्यायाधीश डी. वाय. चंद्रचूड आनी न्यायाधीश जे. बी. पार्डीवाला हांच्या खंडपिठान म्हणलें- आमी गर्भपात करपाक परवानगी दितात, कारण ही एक असामान्य केस. पिडेस्त व्यक्ती खातीर दरेक वर म्हत्वाचें आसता.
वैजकी अहवालाचो उल्लेख करून खंडपिठान सांगलें, गुरवारपण चालू उरल्यार पिडेस्ताचे मानसीक आनी शारिरीक भलायकेचेर परिणाम जाता. गर्भपातांत कांय प्रमाणांत धोको आसता अशेंय अहवालांत सांगलां तरी गुरवारपण चालू दवरपाक आनीकूय चड धोको आसता.
नेण्टे चलयेचे आवयन हाचे पयलीं मुंबय उच्च न्यायालयांत याचिका दाखल केल्ली. ४ एप्रीलाक मुंबय उच्च न्यायालयान अल्पवयीन चलयेक गर्भपात करपाक परवानगी दिवंक नाशिल्ली. हाचे उपरांत चलयेचे आवयन सर्वोच्च न्यायालयांत याचिका दाखल केली. सर्वोच्च न्यायालयान १९ एप्रीलाक ही केस आयकून उच्च न्यायालयाच्या निर्णयाक न्हयकार दिवन अल्पवयीन चलयेची वैजकी तपासणी करपाचो आदेश दिलो.
ह्या प्रकरणांत आयपीसी कलम ३७६ आनी पोक्सो कायद्या खाला केस नोंद जाल्या. लैंगीक अत्याचाराचेर मुंबय उच्च न्यायालयाच्या वैजकी अहवालांत अल्पवयीन पिडेस्ताचे शारिरीक आनी मानसीक स्थितीचें मुल्यांकन करपाक अपेस आयलां अशें चंद्रचूड हांच्या खंडपिठान १९ एप्रीलाक सुनावणेंत सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
