भांगरभूंय | प्रतिनिधी
पणजी, प्रतिनिधी: गोंयांत 1 ते 2 मे मेरेन ‘झिरो शॅडो डे’ पळोवपाक मेळटलो. हे दिसा सुर्य सामको माथ्या वयर आसतलो. देखून मनश्याची सांवळी दिश्टी पडचीना. असली घडणूक पयलेच फावट गोंयांत पळोवपांक मेळटा.
झिरो शॅडो डे म्हळ्यार सांवळी नाशिल्लो दीस. ही एक अशी अद्भूत घडणूक जातुंत सुर्य सामको उंचेल्या बिंदूचेर आसता आनी तो सामको तकले वयर आयिल्ल्यान ल्हव ल्हव मनशाची सांवळी गायब जाता. संवसारात 23.5 डिग्री उत्तर आनी 23.5 डिग्री दक्षीण अक्षांशाचेर रावपी लोकांक हाचो अणभव येता. पृथ्वीचे कक्षेचे आनी वर्सभर बदलपी सुर्य किरणांचो कोन हे बाबत लोकां मदीं जागृताय घडोवन हाडपाक हो दीस झिरो शॅडो डे म्हूण मनयतात.
वर्नल इक्विनोक्स ही प्रक्रिया जाले उपरांत ‘नो शॅडो’ उत्तर अर्धगोलात प्रवास करपांक सुरु करता. देखून मे चे 1 वेर मडगांवां आनी 2 वेर पणजे सांवळी नाशिल्लो दीस पळोवपाक मेळटलो. ह्या दिसाचो लोकांक अणभव घेवपा खातीर फ्रेंन्ड्स आॅफ एस्ट्रोनोमी असोसिएशन हांणी गोंयच्या 2 वेधशाळांनी वेवस्था केल्या. 1 मेक मडगावा रवींद्र भवनांतल्या भौशीक खगोलशास्त्रीय वेधशाळेंत जाल्यार 2 मेक पणजे जुन्ता हावजांतल्या खगोलशास्त्रीय वेधशाळेंत हो दीस दनपरां 12.15 ते 12.45 मेरेन अणभवपांक मेळटलो. सगळ्यांक प्रवेश फुकट आसतलो, अशे असोसिएशनाचे अध्यक्ष सतिश नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
