भांगरभूंय | प्रतिनिधी
10-12 लाख रुपया फारायले; चोर सीसीटीव्हींत कैद, पूण धुसर
भांगरभूंय । प्रतिनिधी
म्हापशें: म्हापशेंच्या नामनेच्या श्रीदेव बोडगेश्वर देवळांत चार अज्ञात चोरांनी धाडसी चोरी केली. देवळाच्या सुरक्षा रक्षकाक कदेलाक बांदून दोन फंडपेटयो फोडल्या आनी भितरले सुमार 10- 12 लाख रुपया फारायले. चोरांनी नियोजन करून ही चोरी केल्ल्याचो दुबाव पुलिसांनी उक्तायला.
चोरयेची ही घडणूक आयतारा 28 एप्रीलाक मध्यान रातीतर 2.05 ते 2.38 ह्या वेळांत घडली. चोरांनी देवळाच्या फाटले वटेन आशिल्ले बांय कडल्यान देवळाच्या वाठारांत प्रवेश केलो. देवळाचे फाटले वटेन तेळणी केले उपरांत दुबावीत देवळांत भितर सरले. देव बोडगेश्वराचे मुर्ती फाटल्यान श्री सत्यनारायण मुर्ती लागसार सुरक्षा रक्षक दशरथ ठाकूर (61) न्हिदिल्लो. दुबावितांनी चाकवाचो भंय दाखोवन ओलीस धरलो आनी जिवेशी मारपाची धमकी दिली. ताच्याच आंगा वयलो शर्ट काडून काडून ताचे हात बांदले. ते उपरांत दोगांनी देवाचे मुर्ती मुखार आनी फाटले वटेनची अश्यो दोन मुख्य फंडपेटयो फोडल्यो. तिसरी फंडपेटी फोडपाचो तांणी यत्न केलो, पूण तातूंत तांकां येस मेळूंक ना. ह्यो फंडपेटयो फोडचे खातीर तांणी लोखणाचो कटर आनी दिसपिसाचो वापर केलो.
दोनूय फंडपेटयांनी एक रुपया लेगीत त्या चोरांनी दवरूंक ना. तीन साकाच्या पोतयांनी भरून ही रोख रकम त्या चोरांनी व्हेली. चौगांतल्या दोगांनी हुडीचें जॅकेट घातिल्लें. तिसऱ्यान तोपी जाल्यार चवथ्यान आपलें तोंड लेसान धांपिल्लें.
घडणुकेची म्हायती मेळटाच देवस्थानाचे अध्यक्ष आनंद भाईडकार, सचीव अॅड. वामन पंडीत, देवेश शिंदे, सुशांत गांवस, पांडुरंग वराडकार, राजेंद्र पेडणेंकार ह्या पदाधिकाऱ्यांनी घडणुकेचे सुवातेर धांव घेवन पळोवणी केली. तशेंच पुलीस उपअधिक्षक संदेश चोडणकार, निरिक्षक निखील पालेकार, उपनिरिक्षक बाबलो परब हांच्या फुडारपणा खाला पुलिसांनी पंचनामो केलो. चोरांचो माग घेवचे खातीर तांणी देवळाच्या वाठारांत सोद तपास केलो.
देवळाच्या सगळ्या सीसीटीव्ही कॅमेऱ्यांनी चोरी करतना दुबावीत दिसतात, पूण हाय रिझोल्युशनाचे सीसीटीव्ही कॅमेरे नाशिल्ल्यान चोरांचीं मुखामळा धुंसर दिसतात.
दुबावितांनी आयतारा मध्यानरातीर 2.05 वरांचेर देवळांत प्रवेश केलो आनी चोरी करून 2.38 वरांचेर भायर सरले. ते उपरांत दोनूच मिण्टांनी म्हणल्यार 2.40 वरांचेर एक भावीक देवळांत देवदर्शना खातीर आयलो. देवाचे मुर्तीक प्रदक्षिणा घालतना ताका कदेलाक बांदून घातिल्ले स्थितींत सुरक्षारक्षक दिश्टी पडलो. तांणी ताका सोडयलो आनी लागींच रावपी श्याम गांवकार हांच्या घरच्यांक ही खबर सांगली. अंबर गांवकार हांणी देवळांत चोरी जाल्ल्याची म्हायती देवस्थानाच्या पदाधिकारी आनी पुलिशेक दिली. म्हापशें पुलिसांनी ह्या प्रकरणांत सुरक्षारक्षक दशरथ ठाकूर हांचे कागाळीच्या आदारान अज्ञात चोरां आड गुन्यांव दाखल केला. फुडलो तपास पुलीस करतात.
दोन म्हयन्यां आदीं जाल्लो चोरयेचो यत्न
दोन म्हयन्यां आदीं 28 फेब्रुवारी 2024 ह्या दिसा देवळा मुखार वयल्या दोवाच्या पादुकांची पेटी फोडपाचो यत्न जाल्लो. पूण तो प्रकार सुरक्षारक्षक आनी न्हिदिल्ल्या एका भाविकाक लागून अपेशी थारिल्लो. पुलिसांनी वरा भितर दोगांक अटक केल्ली. हे घडणुके उपरांत पुलिसांनी देवस्थान समितीक गरजेची खबरदारी घेवपाची सुचोवणी केल्ली. फंडपेटयांक सुरक्षा अलार्म यंत्रणा बरयिल्ली जाल्यार घडये ही चोरी टाळप शक्य आशिल्लें, अशी म्हायती पुलीस सुत्रांनी दिली.
देव बोडगेश्वर देवळांतल्यो दोन फंडपेटयो चोरांनी फोडल्यो. सुमार 10 ते 12 लाख रुपया फारायिल्ल्याचो अदमास आसा. फाटल्या फेब्रुवारींत ह्या फंडपेटयांतले पयशे देवस्थान समितीन काडिल्ले. दर चार म्हयन्यांनी दोन फंडपेटयो उक्तो करून तातूंतले पयशे काडटात. पुलिसांनी मध्यानराती वेळार देवळाच्या वाठारांत गस्त घालपाची गरज आसा. दुबावितांनी रेकी करून नियोजन करून ही चोरी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
