भांगरभूंय | प्रतिनिधी
पत्रादेवी 42.63, जाल्यार चिंचोण्यां 12.93 लाखांच्या सोऱ्याचो आस्पाव
भांगरभूंय । प्रतिनिधी
पेडणें/ मडगांव: पत्रादेवी तपासणी नाक्यार 42 लाख 63 हजारांचो सोरो धरलो. जाल्यार चिंचोण्यां 12.93 लाखांचो सोरो धरलो.
मेळिल्ले म्हायती प्रमाण बुधवारा सकाळीं 11 वरांचेर गोंयांतल्यान महाराष्ट्रांत वचपी एमएच 4701 नंबराची गाडी सोऱ्याची बेकायदो येरादारी करताली. गाडी आडावन चवकशी केली तेन्ना गाडयेंत इलॅक्ट्रॉनीक कोयर आशिल्ल्याचो दावो चालकान केलो.
अधिकाऱ्यांक दुबाव मारिल्ल्यान गाडयेची तपासणी केली. त्या वेळार गाडयेंत वट्ट 42 लाख 63 हजारांचो सोरो सांपडलो. पुलिसांनी तो तशेंच गाडी लेगीत जप्त केली. जप्त केल्ले गाडयेचें मोल 38 लाख रुपया आसा. वाहन चालक आनी क्लिनर दोगांकूय अबकारी विभागान ताब्यांत घेतल्यात.
अबकारी विभागाचे अधिकारी राजेश नायक हांच्या मार्गदर्शना खाला वासुदेव गांवस, महेश गांवकार, भारत पागी हांणी कारवायेंत वांटो घेतलो.
दांडेवाडो चिंचोणेच्या एका गुदांवाचेर बुधवारा अबकारी खात्याच्या साश्टी विभागा वतीन धाड धातली. हे कारवायेंत 12.93 लाखांचो 4028 लिटर बेकायदो सोऱ्याचो सांठो जप्त केलो. दांडेवाडो चिंतणी वाठारांत सोऱ्याचो बेकायदो सांठो केल्ल्याची म्हायती साश्ट अबकारी खात्याच्या अधिकाऱ्यांक मेळिल्ली. ते प्रमाण बुधवारा अबकारी निरिक्षक दुर्गादास गावडे हांचे सयत अबकारी निरिक्षक राजेश सालेकार, रॉबर्ट रॉड्रिग्ज, अबकारी सुरक्षा रक्षक संदेश शेटकार, सहाय्यक सुरक्षा रक्षक मनोहर जामुनी आनी ब्रवेश कामत हांच्या पंगडान सोऱ्याचो बेकायदो सांठो केल्ले सुवातेर धाड घातली. थंय तपासणे वेळार विवीध ब्रॅण्डाचो सोऱ्याचो 4028 लिटर बेकायदो सांठो सांपडलो, अधिकाऱ्यांनी तो जप्त केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
