भांगरभूंय | प्रतिनिधी
फोंडें, प्रतिनिधी ः बंद आशिल्लो संजीवनी साखर कारखानो 100 टक्के सुरू जातलो, अशें आश्वासन मुख्यमंत्री डॉ. प्रमोद सावंत हांणी कामगारांक दिले. तशेंच लोकसभा वेंचणुकेची आचारसंहिता सोंपल्या उपरांत कुळेंच्या दुदसागर घसघश्यांचेर जीप भाड्याच्या दराच्या प्रस्नाचेर उपाय सोदून काडतलें हांचे आश्वासन मुख्यमंत्री डॉ. प्रमोद सावंत हांणी दिला.
शेनवारा दनपरां संजीवनी साकर कारखाना लागसार मुख्यमंत्री डॉ. प्रमोद सावंत हांच्या अध्यक्षते खाला खाशेली बसका जाली. आमदार गणेश गांवकार, जिल्हा पंचायत अध्यक्ष सुवर्णा तेंडुलकार, सावड्डें भाजपा मंडळ अध्यक्ष विलास देसाय, सरपंच बालाजी उर्फ विनायक गावस, जिल्हा पंचायत अध्यक्ष सुधा गांवकार, संजीवनी साकर कारखान्यांचे कामगार, जीप मालक आनी ट्रक मालक व्हड प्रमाणांत हाजीर आशिल्ले.
दुदसागर घसघश्याचेर येवपी जीप वेवसायाक लागून व्हड प्रमाणांत धुल्ल प्रदुशण जाता. परिस्थिती बदलली ना जाल्यार आनीक 5 वर्सां उपरांत वेवसाय धोक्यांत पडूं येता. हे खातीर सरकारान 23 कोटी रुपया खर्च करून रस्तो बांदपाचो निर्णय घेतिल्लो. पूण ही केस न्यायालयांत गेल्ल्यान सध्या काम बंद केलां. पूण बेगीनात हो प्रस्न सुटावो जातलो अशेंय मुख्यमंत्री डॉ. प्रमोद सावंत हांणी हे वेळार सांगलें.
मुख्यमंत्री डॉ. सावंत हांणी वाडिल्ल्या दरां संबंदी निर्णय घेवंक नाशिल्ल्यान जीप धनयांनी नाराजगी उक्तायल्या. दर वाडिल्ल्यान पर्यटकांचो आंकडो उणो जाला. जीप धनयांचेर ताचो गंभीर परिणाम जावपाक लागला. मुख्यमंत्री डॉ. सावंत हांणी ठोस निर्णय जाहीर केलो ना जाल्यार जीप धनयांक आनीक त्रास जातले अशी म्हायती जीप धनी निलेश वेळीप हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
