भांगरभूंय | प्रतिनिधी
मुंबय सिटीन सॉल्ट लेक स्टेडियमाचेर जाल्ले फायनलींत मोहन बगान सुपर जायण्ट्साक 3-1 अशा फरकान हारोवन आपलो दुसरो इंडियन सुपर लीग (आयएसएल) किताब जिखलो.
मुंबय सिटी वतीन जॉर्ज डियाज, बिपीन सिंग आनी जॅकब वोज्टस हाणें गोल केले, मोहन बगाना खातीर एकोडो गोल जेसन कमिन्सान केलो.
मोहन बगानान पयल्या अर्दाच्या निमाण्या मिनटाचेर गोल करून आघाडी मेळयिल्ली. पूण, मुंबय सिटीन दुसऱ्या अर्दांत मॅच घुंवडायली. ताका लागून मोहन बगानाक मॅचींत पुनरागमन करपाची संद मेळूंक ना.
पयल्या 10 मिनटांच्या खेळांत दोनूय पंगडांनी एकामेका आड आघाडी घेवपाचो यत्न केलो. मोहन बगानाक 13व्या मिनटाक पयली बरी संद फावो जाली. पूण, पेट्रोटोसाचो बॉल आडावपाक टिरी आयलो. मुंबय वतीन जयेश राणेन गोल करपाची संद तयार केली. पूण, मोहन बगानाच्या बचाव फळयेन गोल जावपाक दिलो ना.
29व्या मिनटाक छंग्टे गोल करपाच्या यत्नांत आशिल्लो. पूण, ताचो यत्न फुकट गेलो. मुंबय सिटीन दोन खेपे प्रतीहल्ले केले. पूण, एकदाय गोल जालो ना. मोहन बगानान 44व्या मिनटाक मुंबय सिटीची बचाव फळी फोडली. कमिंग्सान गोलकीपराच्या रिबावण्डाचो फायदो घेतलो आनी मोहन बगानाचें खातें उगडलें.
दुसऱ्या अर्दांत मुंबय सिटीन सुरवात फ्रण्टफुटाचेर केली. दुसऱ्या अर्दाच्या आठव्या मिनटाक डियाजान बरोबरीचो गोल केलो. मुंबय सिटीन नेटाचो खेळ चालूच दवरलो. ताचो फायदो ताका 81व्या मिनटाक जालो. हो गोल बिपिनान केलो. मॅच सोंपपाक कांय मिनटां बाकी आसतना मुंबय सिटीन आपलो तिसरो गोल करून जैत निश्चीत केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
