भांगरभूंय | प्रतिनिधी
निर्मला सावंतः म्हादय बाबतींत खंयच्याच पक्षाचेर दोश ना
भांगरभूंय । प्रतिनिधी
पणजीः जे उमेदवार म्हादय विशयाचेर झगडून हो मुद्दो संसदेंत पावयतले त्याच उमेदवारांक गोंयकारांनी मत मारून वेंचून हाडपाक जाय. म्हादय वाटोवपा खातीर ही निमाणी संद आसा. ही संद गेली जाल्यार गोंयाक खुबूच गंभीर परिणाम भोगचे पडटले, अशें म्हादय बचाव अभियानाची मुखेली निर्मला सावंत हांणी सांगलें.
म्हादय वाटोवपाची ही आमकां निमाणी संद मेळ्ळ्या. म्हादय न्हंय वाठारांत झाडांची कत्तल चल्ल्या. हो वाठार भुंयकांप संवेदनशील वाठार. जर म्हादय न्हंय आटली जाल्यार थंय भुंयकांप जावन गोंयांचेर ताचे वायट परिणाम जातले. जी घडणूक जोशीमठ उत्तराखंडांत घडली ताची पुनरावृत्ती गोंयांत जातली, असो भंय सावंत हांणी उक्तायलो. 7 मेक गोंयचे दोन खासदार वेंचून हाडचे खातीर गोंयकार मतदान करतले. जे उमेदवार म्हादय बचावाचें काम करतले आनी म्हादय खातीर संसदेंत आवाज काडटले, त्याच उमेदवारांक मत दिवचें, असोय उलो तांणी मारलो.
आपणे जर खंयच्याय एका उमेदवाराचें नांव घेतलें जाल्यार तें आपले राजकी विधान जातलें. आपल्याक लोकांनी निर्णय घेतिल्लो जाय. खंयचो उमेदवार म्हादय वाटायतलो, तें चिंतपाचें आपूण लोकांचेर सोडटां. म्हादय बाबतींत खंयच्याच पक्षाक आपूण दोश दिवपाक सोदिना. भाजप सरकारांत अटल बिहारी वाजपेयी प्रधानमंत्री आसतना तांणी ह्या प्रकल्पाचेर स्थगिती हाडिल्ली. तशेंच काँग्रेसीच्याय सरकारान म्हादयच्या संरक्षणा खातीर पावलां उबारल्यांत. दोनूय पक्षांनी म्हादय खातीर काम केलां, अशें सावंत हांणी सांगलें. गोंयांत आदींच उदकाचो उणाव आसा. तशेंच जे उदकाचे सांठे आसात ते उणे जायत आसात, अशें राज्यांची आंकडेवारी सांगता. सरकार म्हणटा, भिवपाची गरज ना, पूण खऱ्यांनीच आमकां भिवपाची गरज आसा. गोंयचे 45 टक्के उदक म्हादयंतल्यान येता. म्हादय समजा आटली जाल्यार बागायती सुकतल्यो, शेतां- खाजनां, नुस्तें पोसपाच्या बांदांचें लुकसाण जातलें आनी न्हंयेचे खारसाणीचें प्रमाण चुकत जाल्यार जें नुस्तें थंय मेळटा तें मरतलें. तेचवरी मिठागरांय नश्ट जातलीं, अशी भिरांत सावंत हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
