बंगळुरूची प्ले ऑफाची आस्त कायम

भांगरभूंय | प्रतिनिधी

गुजरात टायटन्सान दिल्ले 148 धांवड्यांचे मोखीचो फाटलाव करतना विराट कोहली आनी फाफ ड्युप्लेसीस हे जोडयेन पयले विकेटी खातीर 92 धांवड्यांची भागिदारी केली. ताका लागून रॉयल चॅलेंजर्स बंगळुरू 10 ओव्हरींनी मॅच सोंपयतले अशें दिशिल्लें. पूण, गुजरात टायटन्साच्या जॉश लिटलान मॅचींत उमळशीक हाडली. ताणें फाटोफाट 4 विकेटी घेवन बिनबाद 92 वयल्यान बंगळुरूची अवस्था 6 बाद 117 अशी केली.

बंगळुरून 25 धांवड्यांच्या फरकान 6 विकेटी व्हगडायिल्ल्यान मॅच उमळशीक वाडोवपी स्थितींत पावली. पूण, दिनेश कार्तिक आनी स्वप्निल सिंग हांणी विकेटी पडपाची गळटी थांबयली आनी मॅच 4 विकेटींनी जिखून दिली.

कोहली आनी ड्युप्लेसीस हे जोडयेन 5.5 ओव्हरींनी 92 धांवड्यो करून बंगळुरूचें जैत निश्चीत केल्लें. कोहलीन सवी धांवडी घेना फुडें टी-20 क्रिकेटींत 12,500 धांवड्यो पुर्ण केल्यो. असो पराक्रम करपी तो भारताचो पयलो बॅट्समन थारलो.

जॉश लिटलान गुजराताक पयलें येस येस मेळोवन दितना ड्युप्लेसीसाक बाद केलो. ड्युप्लेसीसान 23 बॉलांनी 10 चवके आनी तीन सक्यांचे मजतीन 64 धांवड्यो केल्यो. ते उपरांत आयिल्ले विल जॅक्स (1), रजत पाटीदार (2), ग्लॅन मॅक्सवॅल (4) आनी कॅमेरून ग्रीन (1) चुकीचे शॉर्ट खेळून तंबूंत परतले. पूण, कोहलीन एक बाजू सांबाळून धरली. ताका लागून बंगळुरूक एक धीर आशिल्लो. पूण, नूर अहमदान गुजराताक म्हत्वाची विकेट मेळोवन दिली. कोहली 27 बॉलांनी दोन चवके आनी चार सक्यां सयत 42 धांवड्यो करून तंबूंत परतलो आनी बंगळुरूक 117 धांवड्यांचेर सवो धपको बसलो.

दिनेश कार्तिक आनी स्वप्निल सिंग ही जोडी बंगळुरूची अखेरची आस्त आशिल्ली. कार्तिकान राशीद खानाचे पयले ओव्हरींत 16 धांवड्यो करून कांय प्रमाणांत चेपण उणें केलें. ह्या दोगांयनी 18 बॉलांनी 35 धांवड्यांची भागिदारी करून बंगळुरूचें जैत निश्चीत केलें.

स्वप्निल 9 बॉलांनी 15 आनी कार्तिक 12 बॉलांनी 21 धांवड्यो करून नाबाद रावलो. बंगळुरून 13.4 ओव्हरींनी 6 विकेटी व्हगडावन 152 धांवड्यो करून जैत जोडलें.

ह्या जैता उपरांत बंगळुरू गुणतकट्यांत सातवे सुवातेर पावलो. दुसरे वटेन मुंबय इंडियन्स 10वे सुवातेर घसरलो.

ते आदीं रॉयल चॅलेंजर्स बंगळुरून उत्कृश्ट रितीन सांघीक कामगिरी करून दाखयली. मोहम्मद सिराज, यश दयाल हांणी म्हत्वाच्या खिणाक विकेटी घेतल्यो. विराट कोहलीन एका बॅट्समनाक धांवबाद केलो. विजयकुमार वैशाखान 20वे ओव्हरींत सेगीत तीन विकेटी घेतल्यो. हातूंतलो एकलो धांवबाद जाल्ल्यान ताची हॅट्रीक जाली ना.

ते आदीं रॉयल चॅलेंजर्स बंगळुरून टॉस जिखून पयलीं फिल्डींग करपाचो निर्णय घेतलो. मोहम्मद सिराजान दुसरेच ओव्हरींत वृ्द्धिमान साहाक (1) बाद केलो. सिराजान आपले फुडले ओव्हरींत शुभमन गील (2) हाका लेगीत तंबूंत धाडून गुजराताक व्हड धपको दिलो.

कॅमरून ग्रीनान ताचे पयले ओव्हरींत साई सुदर्शनाक (6) चुकीचो शॉर्ट मारपाक लायलो आनी विराट कोहलीन ताची सोंपी कॅच धरली. पयल्या पावर प्लेंत गुजरातान 23 धांवड्यांनी 3 विकेटी व्हगडायल्यो. अंदूंच्या हंगामांतली ही आयपीएलांतली सगल्यांत बाबत कामगिरी थारली. हाचे पयलीं पंजाब किंग्सान सनरायझर्स हैदराबादा आड 3 बाद 27 धांवड्यो केल्ल्यो.

डॅव्हिड मिलर आनी शाहरुख खान हांणी गुजराताचो डाव सांबाळपाचो यत्न केलो आनी 10 ओव्हरींनी पंगडाचो स्कोर 61 मेरेन पावयलो. 11वे ओव्हरींत मिलराची कॅच कर्ण शर्मान सोडली. पूण, कर्ण शर्मान ताचेच ओव्हरींत विकेट घेतली. मिलरान 20 बॉलांनी तीन चवके आनी दोन सक्यां सयत 30 धांवड्यांचेर बाद जालो आनी ताची शाहरुखा वांगडी 61 धांवड्यांची भागिदारी सोंपली.

फुडले ओव्हरींत शाहरुख खान (37) धांवबाद जालो. अशे तरेन गुजराताचो अर्दो पंगड 87 धांवड्यांचेर तंबूंत परतून गेल्लो. राशीद खान आनी राहुल तेवतिया हांणी गुजराताची गाडी परतून रुळाचेर हाडली. यश दयालान ही भागिदारी फोडली. राशीद 18 धांवड्यांचेर बोल्ड जालो. अशे तरेन दोगां मदली 29 बॉलांनी 44 धांवड्यांची भागिदारी सोंपली. यशान तेच ओव्हरींत तेवतियाक (35) बाद करून मॅच परतून घुंवडायली. गुजराताचो डाव 19.3 ओव्हरींनी 147 धांवड्यांचेर सोंपलो.