भांगरभूंय | प्रतिनिधी
मुख्यमंत्रीः तरणाट्यांनी स्पर्धा परिक्षांचोय अभ्यास करचो
भांगरभूंय । प्रतिनिधी
पणजीः गोंयांतल्या तरणाट्या चल्या- चलयांक गोंयांत खूबश्यो रोजगाराच्यो संदी उपलब्ध आसात. पूण चडश्या जाणांक सरकारी नोकरीच जाय. सध्या पुलीस शिक्षण तशेंच हेर खात्यांनी सुमार 5 हजार सुवातो रित्यो आसात. फुडल्या कांय म्हयन्यांत कर्मचारी भरती आयोगा वतीन त्यो भरतले. पूण तरणाट्यांनी फक्त सरकारी नोकरेचीच वाट पळोवची न्हय. स्पर्धा परिक्षांचो लेगीत अभ्यास करचो. ते संबंदांत मार्गदर्शन सध्या सांखळी, खांडोळें आनी केपें म्हाविद्यालयांत दितात. ताचोय लाव तरणाट्या गोंयकार चल्या- चलयांनी घेवचो, अशें मुख्यमंत्री डॉ. प्रमोद सावंत हांणी सांगलें.
मुख्यमंत्री डॉ. सावंत शेनवारा प्रुडंट मिडियाच्या ‘रावंड टेबल’ कार्यावळींत उलयताले. त्या वेळार तांणी वयली म्हायती दिली.
म्हादय न्हंय सांबाळपा खातीर गोंय सरकारान, केंद्र सरकारान गरजेचे सगळे यत्न केल्यात. ताका लागून म्हादय प्रवाहाची स्थापना जाली. हो प्रस्न सध्या सर्वोच्च न्यायालयांत आसा. पूण म्हादय सांबाळपाक आपलें सरकार बांदील आसा. फुडारांतूय ते खातीर गरजेचीं पावलां उखलतलें, अशें म्हादय संबंदांतल्या प्रस्नाक जाप दितना मुख्यमंत्र्यान सांगलें. लोकसभा वेंचणूक आनी प्रचारा विशींय ह्या वेळार मुख्यमंत्री उलयले. तांणी सांगलें, हे खेपे भाजप उमेदवार उत्तर गोंयांतल्यान एक लाख जाल्यार दक्षीण गोंयांतल्यान 60 हजार मतांची आघाडी घेवन जिखतले. ही वेंचणूक आमी उदरगत आनी संघटणा अश्यो दोन मुद्द्यांचेर लडयतात. देशाचें सरकार थारावपी ही वेंचणूक. गोंयांतलो म्हादय, कोळसो, सीआरझॅड, खण हे प्रस्न सुटावे करपाचे यत्न गोंय सरकारा कडल्यान चालू आसात. मुख्यमंत्री ह्या नात्यान केंद्रा कडेन फाटपुरवण करून हे प्रस्न सासणाचे निकालांत काडपाचे पुराय यत्न आपूण करता. गोंयांतले खूबश्या म्हत्वाच्या प्रस्नांचे खटले राष्ट्रीय हरीत लवाद (एनजीटी), उच्च न्यायालय तशेंच सर्वोच्च न्यायालयांत लेगीत चालू आसात. हाचोय विचार लोकांनी करप गरजेचें आसा, अशेंय मुख्यमंत्री डॉ. सावंत हांणी सांगलें.
केरळ, तामिळनाडूंतलेय मतदार भाजपा कडेन आकर्शीत
अंदूंची लोकसभा वेंचणूक लडोवपी इंडी आघाडी कडेन प्रधानमंत्रीपदाचो उमेदवारूच ना. एनडीए आघाडीचें तशें ना. फाटल्या 10 वर्सांत गोंया सयत देशभराची सर्वांगी उदरगत करपी प्रधानमंत्री नरेंद्र मोदी हे खेपेय एनडीएचे प्रधानमंत्रीपदाचे उमेदवार आसात. तांचे कडेन फुडल्या 25 वर्सांचे उदरगतीचें नियोजन तयार आसा. ताका लागून आतां मेरेन केन्नाच भाजपा कडेन आकर्शीत जावंक नाशिल्ले केरळ, तामिळनाडूंतले मतदार लेगीत भाजपा कडेन आकर्शीत जातात, असो दावोय मुख्यमंत्री डॉ. प्रमोद सावंत हांणी केलो.
मोदी फुडारांतूय गोंयची उदरगत करतले
लोकसभा वेंचणुकेंतल्यान देशाचें सरकार थारता. ताका लागून गोंयांत आमी श्रीपाद नायक वा पल्लवी धेंपो हांच्या नांवान न्हय, जाल्यार प्रधानमंत्री नरेंद्र मोदी हांच्या नांवान मतां मागतात. ह्या दोनूय उमेदवारांक गोंयकारांनी वेंचून दिल्यार मोदी तिसरे खेपे प्रधानमंत्री जातले आनी गोंयची फुडारांतूय घसघशीत उदरगत करतले, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
