भांगरभूंय | प्रतिनिधी
मुख्यमंत्रीः ऊस पीक वाडोवपाची सुचोवणी
भांगरभूंय । प्रतिनिधी
फोंडें: संजिवनी साकर कारखानो 100 टक्के सुरू करतले. ते खातीर गोंयांतल्या ऊस उत्पादकांनी उसाचें पीक वाडोवचें. कुळेंच्या दुदसागर घसघशा वयल्या जीप भाड्याचे दराच्या प्रस्नाचेर लोकसभा वेंचणुकेची आचारसंहिता सोंपले उपरांत उपाय काडटले, अशें आस्वासन मुख्यमंत्री प्रमोद सावंत हांणी दिलें.
संजिवनी साकर कारखान्या लागसार शेनवारा दनपारां मुख्यमंत्री प्रमोद सावंत हांचे अध्यक्षते खाला खाशेली बसका जाली. ते बसकेंत आमदार गणेश गांवकार, जिल्हो पंचायत अध्यक्ष सुवर्णा तेंडुलकार, सांवड्डें भाजप मंडळाचे अध्यक्ष विलास देसाय, सरपंच बालाजी उर्फ विनायक गांवस, जिल्हो पंचायत अध्यक्ष सुधा गांवकार, संजिवनी साकर कारखान्याचे कामगार, जीप धनी तशेंच ट्रक धनी व्हड संख्येन हाजीर आशिल्ले.
संजिवनी साकर कारखानो निश्चीत सुरू करतले. ते खातीर कामगार तशेंच ऊस उत्पादकांनी भियेवचें न्हय. गोंयांतलें उसाचें पीक खूब प्रमाणांत वाडोवपाचो यत्न जावपाक जाय. हेच खातीर फुडल्या मोसमांत गोंयांतलो ऊस साकर कारखान्यांत घेतले, अशें डॉ. सावंत हांणी सांगलें.
दुदसागर घसघशाचेर येरादारी करपी जीप वेवसायाक लागून व्हड प्रमाणांत धुल्लाचें प्रदुशण जाता. स्थितींत बदल केलो ना जाल्यार आनीक 5 वर्सांनी हो वेवसाय धोक्यांत येवपाक शकता. तेच खातीर सरकारान खास 23 कोटी रुपया खर्च करून रस्तो बांदपाचो निर्णय घेतिल्लो. पूण प्रकरण न्यायालयांत गेल्ल्यान सध्या काम बंद दवरलां. जीप दर वाडी संबंदांत आचारसंहिता सोंपले उपरांत ती उणी करपाचो निर्णय घेतले, अशें डॉ. सावंत हांणी सांगलें.
दरवाडी संबंदांत मुख्यमंत्र्यान निर्णय घेवंक नाशिल्ल्यान जीप धनयांनी नाराजी उक्तायली. दरवाडीक लागून पर्यटकांची संख्या उणी जाल्या. ताचो गंभीर परिणाम जीप धनयांचेर जाता. मुख्यमंत्र्यान ठोस निर्णय घेतलो ना जाल्यार जीप धनी आनीक संकश्टांत सांपडटले, अशें जीप धनी निलेश वेळीप हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
