काँग्रेस तीन खेपे, भाजप दोन खेपे गोंयच्या दोनूय जाग्यांचेर जैतिवंत

भांगरभूंय | प्रतिनिधी

पणजी, प्रतिनिधी ः लोकसभा वेंचणुकेंत दोनूय सीट जिखपाक काँग्रेस पक्ष फुडें आसा. काँग्रेसीन उत्तर आनी दक्षीण गोंयचे दोनूय सीट वांगडाच तीन खेपे जिखल्यात. जाल्यार भाजपान दक्षीण गोंयची सीट दोन फावटी जिखल्या. मगो पक्ष अप्रत्यक्षपणांन हे दोनूय सीट एकच फावट जिखला.
मुक्त गोंयचे पयले लोकसभा वेंचणुकेंत दोनूय सीट जिखपा खातीर मगो पक्षांक प्रजा सोशलिस्ट पार्टीचो आदार घेवचो पडलो. 1963 चे लोकसभा वेचणुकेंत मगोन तेंको दिल्ले प्रजा सोशलिस्ट पक्षाचे उमेदवार पीटर आल्वारीस हे 30,725 मतांची आघाडी घेवन जिखून आयले जाल्यार दक्षिणेंत मगो पक्षांचे उमेदवार मुकुंद शिंक्रे हे 2851 मतांची आघाडी घेवन जिखून आयले.
1984 चे लोकसभा वेंचणुकेंत काँग्रेसीन दोनूय सीटांचेर जैत मेळयिल्लें. उत्तरेत काँग्रेसीचो उमेदवार शांताराम नायक हे 39,548 मतांची आघाडी घेवन वेंचून आयल्ले जाल्यार दक्षिणेंत एदुआर्द फालेरो हे 58,809 मतांची आघाडी घेवन वेंचून आयिल्ले.
1991 लोकसभा वेचणुकेंत दोनूय सीट जिखपाची कामगिरी काँग्रेसीन कायम दवरली. उत्तरेंत काँग्रेसीचे उमेदवार हरीश झांट्ये 57,444 मतांची आघाडी घेवन जिखले जाल्यार दक्षिणेंत एदुआर्द फालेरो 59,238 मतांची आघाडी घेवन जैतिवंत जाले.
काँग्रेसीन मदी विसव घेवन परत 1998 चे लोकसभा वेंचणुकेंत दोनूय मतदारसंघात तिसरे खेपे जैत जोडलें. उत्तरेंत काँग्रेसीचे उमेदवार रवी नायक हे 417 मतांची आघाडी घेवन जिखून आयले जाल्यार दक्षिणेंत तांचे उमेदवार फ्रान्सिस सार्दिन 7,850 मतांचे आघाडी सयत जिखून आयले. हे उपरांत काँग्रेसीक हे दोनूय सीट मेळोवपाक येस येवंकना.
एक वर्सा उपरांत रोखडीच वेंचणूक जावन 1999 लोकसभा वेंचणुकेंत भाजपान गोंयच्या दोनूय सीटांचेर जैत जोडलें. उत्तरेंत भाजपाचे आमदार श्रीपाद नायक 36,721 मतांची आघाडी घेवन जैतिवंत जाले जाल्यार दक्षिणेत रमाकांत आंगले हे 14,457 मतांची आघाडी घेवन जैतिवंत थारले.
उपरांत तीन लोकसभा वेंचणुको जाल्या उपरांत भाजपान 2014 च्या लोकसभा वेंचणुकेंत दुसरे खेपे जैत जोडलें. उत्तरेंत भाजपाचे उमेदवार श्रीपाद नायक 1,05,599 व्हड मतांची आघाडी घेवन वेंचून आयले जाल्यार दक्षिणेंत नरेंद्र सावयकार हे 32,330 मतांची आघाडी घेवन वेंचून आयले.
पूण, उपरांत 2019 ची वेचणुकेंक भाजपांक आपलो दक्षीण गोंयचो सीट काँग्रेसीक व्हगडावचो पडलो. हे फावट 2023 लोकसभा वेंचणूक कोणाच्या फावरांत जातली. दोनूय जागे खंयचो पक्ष जिखतलो काय तांका एका जाग्याचेर समाधान मानचें पडटलें ही उमळशीकेची गजाल जावन आसा.