भांगरभूंय | प्रतिनिधी
इंडीयन प्रिमियर लिगेचे (आयपीएल) सुपर सण्डेची दुसरी मॅच येजमान लखनौ सुपर जायण्ट्स आनी कोलकाता नायट रायडर्स ह्या पंगडां मदीं जातली. ह्या पंगडां मदीं अजून मेरेन चार मॅची जाल्यात. तीन मॅची लखनौन जिखल्यात, जाल्यार एके मॅचींत कोलकातान येस मेळयलां. हे खेपे दोगूय पंगड लखनौच्या घरच्या मैदानाचेर खेळटले.
शुक्रारा जाल्ले मॅचींत मुंबय इंडियन्सा आड कोलकाता नायट रायडर्सान 12 वर्सांनी पयले खेपे वानखेडे स्टेडियमाचेर जैत जोडपाक येस मेळयिल्लें. ते मॅचींत आंद्रे रसेलान उत्कृश्ट बॉलींग घाल्ली. आंकड्यांचेर विस्वास दवरलो जाल्यार रसेल आयज परतून बॉलिंगेंत उत्कृश्ट करपाक शकता. लखनौचो उत्कृश्ट फॉर्मांत आशिल्ल्या स्टॉयनीसाक टी-20त रसेलान चार खेपे बाद केला. दुसरे वटेन स्टॉयनीसान आपले टी-20 कारकिर्दींत रसेला आड 31 बॉलांनी फकत 33 धांवड्यो केल्यात.
स्टॉयनीसा खेरीत निकोलस पुरनाक लेगीत रसेलान टी-20त चार खेपे बाद केला. पूण, रसेला आड पुरनाची स्ट्रायक रेट 152.17ची आसा. लखनौचो ओपनर क्विंटन डी कॉकान रसेला आड 200चे स्ट्रायक रेटीन धांवड्यो केल्यात. पूण, रसेलान ताका पांच खेपे तंबूंत धाडला.
फाटल्या चार हंगामां कडेन तुळा केली जाल्यार अंदूंच्या हंगामांत लखनौचो मुखेली लोकेश राहुलान पावर प्लेंत आपली स्ट्रायक रेटीक बरीच वयर व्हेल्या. 2020 ते 2023 मेरेन पावर प्लेंत राहुलाची स्ट्रायक रेट 119 ते 125चे मदीं आशिल्ली. पूण, अंदूं पयल्या स ओव्हरींनी तो 145चे स्ट्रायक रेटीन धांवड्यो केल्यात.
निकोलस पुरनान 2023त खेळिल्ल्या टी-20 मॅचींनी 77 सके मारिल्ल्यो. त्या वर्सा सगल्यांत चड सके मारपाचे वळेरेंत तो कॉलिन मुनरो उपरांत दुसरे सुवातेर आशिल्लो. अंदूं लेगीत पुरन तेच सुवातेर आसा. ताणें अंदूं अजून मेरेन 63 धांवड्यो केल्यात. पयले सुवातेर हॅन्रीक क्लासेन आसा. क्लासेनान अजून मेरेन 69 सके मारल्यात. पुरनाचो कच्चो दुवो म्हणल्यार 2023 सावन पुरनान ऑफ ब्रेक बॉलरां आड 160 खेळ्ळा. पूण, फकत आठूच सके मारपाक येस मेळयलां. दाव्या हातान घालपी स्पिनरां आड 52 बॉल खेळ्ळा. पूण, तांच्या आड एकूच सको मारला. हाचे वयल्यान एक गजाल स्पश्ट जाता ती म्हणल्यार, बॉल भायले वटेन स्पिन जाता त्या वेळार पुरनाक व्हड शॉर्ट खेळपाक जमना.
कोलकाताची ओपनरांची जोडी सुनील नरेन आनी फिल सॉल्ट हे जोडी सध्या फॉर्मांत आसा. हे जोडयेन अजून मेरेन 492 धांवड्यो केल्यात. ही जोडी 12 परस चड रन रेटीन धांवड्यो करता. सॉल्ट फास्ट बॉलरां आड जलद रितीन धांवड्यो करता, जाल्यार सुनील नरेन स्पिनरां आड बरे तरेन खेळटा. ताका लागून प्रतिस्पर्धी पंगडांच्या बॉलरांक तांच्या आड बरें प्रदर्शन करपाक अपेस येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
