भांगरभूंय | प्रतिनिधी
घेतलें पुर्तुगेज नागरिकत्व; 19,949 मतदारांची भर
भांगरभूंय । प्रतिनिधी
पणजीः हालींच वेंचणूक आयोगान लोकसभा वेंचणुके खातीरची गोंयची अंतीम मतदार वळेरी जाहीर केल्या. हे मतदार वळेरेंतल्यान विवीध कारणां खातीर मतदारांची नांवां वगळ्ळ्यांत. तातूंतल्या 371 जाणांनी भारतीय पासपोर्ट सरेंडर करून पुर्तिगेज नागरिकत्व स्विकारलां. ताका लागून 371 जाणांक मतदाना खातीर अपात्र थारायल्यात. मुख्य वेंचणूक अधिकारी कार्यालयान ही म्हायती दिल्या.
मेळिल्ले म्हायती प्रमाण 371 अपात्र उमेदवारां मदले 92 उत्तर गोंय मतदारसंघांतले जाल्यार 279 दक्षीण गोंय मतदारसंघांतले आसात. देशांत फक्त भारतीय नागरिकांक मतदानाचो हक्क आसा. ताका लागून विदेसी नागरिकत्व स्विकारले उपरांत भारतांत मतदान करपाक मेळना. भारतीय पासपोर्ट सरेंडर करून विदेशी नागरिकत्व स्विकारिल्ले व्यक्तीक मतदान कार्ड लेगीत परतून दिवचें पडटा. ते व्यक्तीन आपूण विदेशी नागरिकत्व स्विकारलां अशें वेंचणूक आयोगाक लेखी कळोवचें पडटा.
हे आदीं वेंचणूक आयोगान 5 जानेवारी सावन नवमतदार नोंदणी सुरू केल्ली. लोकसभा वेंचणुके खातीर अर्ज भरपा खातीर निमाण्या दिसा मेरेन नोंदणी चालू आशिल्ली. ह्या काळांत मतदार वळेरेंत 19 हजार 949 मतदारांची भर पडिल्ली. ते भायर आयोगान विवीध कारणां खातीर मतदार वळेरेंतलीं नांवां वगळिल्लीं. उत्तर गोंयांतल्यान 3555 जाल्यार दक्षीण गोंयांतल्यान 3989 अशीं वट्ट 7544 नांवां वगळिल्लीं. वगळिल्ल्या वट्ट नांवांतलीं 335 मतदारांचीं नांवां दोन खेपे मतदार वळेरेंत नोंद जाल्लीं.
ते भायर उत्तर गोंयांत 1167 आनी दक्षीण गोंयांतल्यान 1027 अश्या वट्ट 2194 भायर पडिल्ल्या मतदारांचीं नांवां लेगीत वगळ्ळ्यांत. उत्तर गोंयांतल्यान 233 आनी द7ण गोंयांतल्यान 142 अशे वट्ट 375 मतदार गायब आशिल्ल्यान तांचीं नांवां काडल्यांत. हीं नांवां काडचे आदीं बीएलओन मतदारांच्या नाम्यार वचून तीन ते चार खेपे तपासणी केल्ली. ते परांत तांच्या शेजाऱ्यां कडेन चवकशी करून गायब मतदार थारायिल्ले. तशेंच गोंया भायर स्थलांतर केल्ल्या 4269 जाणांचीं नांवां मतदार वळेरेंतल्यान वगळ्ळ्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
