भांगरभूंय | प्रतिनिधी
आमदार विजय सरदेसाय हांचो भाजपाचेर आरोप
भांगरभूंय । प्रतिनिधी
मडगांवः मडगांव, कुडतरी आनी नावेली मतदारसंघांतल्या झोपडपट्टी वाठारांतल्या लोकांक भाजपाच्या कार्यकर्त्यां कडल्यान, फुडाऱ्यां कडल्यान धमत्यो दितात. कोणाक मतदान करतले तें आमकां कळयलें. भाजपाक मतदान केलें ना जाल्यार घरां मोडटले, अशी म्हायती मतदारां कडल्यान मेळ्ळ्या. ह्या मतदारांक निर्भय करचे खातीर दीसभर इंडिया गटांतल्या फुडाऱ्यां वरवीं मोहीम हातांत घेतली, अशी म्हायती आमदार विजय सरदेसाय हांणी दिली.
फातोड्ड्यां घेतिल्ले पत्रकार परिशदेंत सरदेसाय उलयताले.
झोपडपट्टी वाठारांत इंडिया गटाच्या कार्यकर्त्यांक प्रचार करपा पासून कांय जाणांनी आडायले. तशेंच मतदारांक घरां मोडपाची धमकी दिवन मतदान करपाक सांगतात, असो आरोप सरदेसाय हांणी केलो.
मडगांवच्या कोलमोरोड, घोगळ हावसींग बोर्ड, नावेली आनी ते उपरांत मोतीडोंगर ह्या वाठारांनी वचून भियेवपाची गरज ना अशें सांगलें. तशेंच कोणाकूच भिये नासतना मतदान करात, असो उलो मारला. उमेदवाराक हारपाची सुलूस लागिल्ल्यान गोंय सरकार पुरस्कृत दादागिरीक सुरवात जाल्या. थळाव्या आमदारा वतीन मोतीडोंगरा वयल्या लोकांक भेश्टोवपाचे प्रकार चल्ल्यात. प्रचार करपा पासून आडयल्यात. हे विशींचो व्हिडियो पुरावो आसा. ताचेर गरजेची कारवाय जावची हे खातीर यत्न करतले. मोतीदोंगारा वयलें मतदान केंद्र हे अतिसंवेदनशील म्हूण घोशीत करचें आनी थंय लोकांक धमकी दिवपी गुंडांचेर कारवाय करपाची मागणी वंचणूक आयोगा कडेन करतले, अशें सरदेसाय हांणी सांगलें. सावियो कुतिन्हो हांणी सांगलें, मोतीडोंगर वाठारांतल्या प्रचारा वेळार कांय जाणांनी आपल्या सयत हेरांक प्रचार करपा पासून आडायले. म्हायतीच्या अधिकारा खाला मागयिल्लो अर्ज दाखयत तो अर्ज घरा मोडपा खातीर आशिल्ल्याचें सांगून भाजपा वतीन तांची दिशाभूल चल्ल्या. कोणाकूच भिये नासतना मतदान करपाक भायर सरचें, असोय तांणी उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
