राहूल गांधी सुणो व्हरपाक आयले गोंयांत; पूण प्रचारा खातीर आयले नात: मुख्यमंत्री

भांगरभूंय | प्रतिनिधी

काँग्रेसीच्या उमेदवारांक केलें किकोंत

भाजपाच्या दोनूय उमेदवारांक वेंचून दिवपाचें आवाहन

पणजी: काँग्रेस फुडारी राहूल गांधी सुणो व्हरपाक गोंयांत आयले. पूण काँग्रेस उमेदवारांचो प्रचारा करपाक मात ते गोंयांत आयले नात. काँग्रेसीच्या उमेदवारांक तांणी किकोंत केलें. हाचे वेल्यान काँग्रेस गोंयाक सदांच दुय्यम स्थान दीत आशिल्ल्याचें दिसून येता, अशी टिका मुख्यमंत्री डॉ. प्रमोद सावंत हांणी केली.

पणजेंतल्या भाजप कचेरेंत घेतिल्ले पत्रकार परिशदेंत ते उलयताले. प्रदेशाध्यक्ष तशेंच राज्यसभा खासदार सदानंद शेट तानावडे आनी केंद्रीय मंत्री तशेंच उत्तर गोंयचे उमेदवार श्रीपाद नायक ह्या वेळार हाजीर आशिल्ले.

काँग्रेसीन खूबशीं वर्सां सत्तेंत रावन गोंया खातीर जें केलें ना तें प्रधानमंत्री नरेंद्र मोदी हांणी फाटल्या धा वर्सांत करून दाखयलें. गोंयचे उदरगती खातीर कोट्यांनी रुपयांचो निधी दिलो. गोंया सयत पुराय देशाचो विकास तांणी केलो. काँग्रेसीच्या काळांत देशांत फक्त 230 वैजकी म्हाविद्यालयां आनी 74 विमानतळां आशिल्लीं. आयज देशांत 700 परस चड वैजकी म्हाविद्यालयां आनी 150 विमानतळां कार्यरत आसात. प्रधानमंत्री मोदी हांणी अखंड भारताचें सपन साकार केलें. अयोध्येंत भव्य अशें राम मंदीर उबारलें. आतंकवाद नानपयत केलो देशाक बरें प्रशासन दिलें आनी आतां तांणी विकसीत भारत करपा खातीर यत्न सुरू केल्यात अशें मुख्यमंत्री डॉ. प्रमोद सावंत हांणी म्हणलें.

तांणी मुखार उलयतना म्हणलें, तांचें हें सपन पुराय जावपा खातीर केंद्रांत परतून तांच्याच फुडारपणा खाला सरकार स्थापन जावप गरजेचें आसा. ताका लागून गोंयकारांनी भाजपाच्या दोनूय उमेदवारांक वेंचून दिवचें अशें अवाहन मुख्यमंत्री डॉ. प्रमोद सावंत हांणी केलें.

काँग्रेसीन सदांच जाती वेल्यान मतां मागलीं. भाजप मात आयजूय विकासाच्या नांवान मतां मागता. जाती धर्मांत फूट घालपाचें कारस्थान काँग्रेस फुडाऱ्यां कडल्यान आयजूय सुरू आशिल्ल्याचो आरोपूय तांणी केलो.

एससी, एसटी, ओबीसी भाजपा बरोबरूच!

राज्यांतले अनुसुचीत जाती (एससी), अनुसुचीत जमाती (एसटी) तशेंच हेर मागासवर्गियांक (ओबीसी) फक्त भाजपान न्याय दिला. ताका लागून हे समाज लोकसभा वेंचणुकेंत भाजपा बारोबर रावतले असो ठाम विस्वास मुख्यमंत्री डॉ. प्रमोद सावंत हांणी उक्तायलो. प्रकाश वेळीप, रमेश तवडकार, गोविंद गावडे, गणेश गांवकार हे एसटी समाजाचे फुडारी भाजपा बरोबर आसात. ताका लागून दिशाभूल करप्यांचेर विस्वास दवरूं नाकात असो सल्लोय तांणी एसटी समाजाक दिलो.