भांगरभूंय | प्रतिनिधी
नरेश सावळः शिक्षणा खातीर मेळपी परवाने आडायिल्ल्याचो आरोप
भांगरभूंय । प्रतिनिधी
दिवचलः श्री संदीपक शिक्षणीक संस्था कासरपालच्या माध्यमीक तशेंच उच्च माध्यमीक शिक्षणा खातीर मेळपी परवाने थळावे आमदार डॉ. चंद्रकांत शेट्ये हांणी राजकी असुये खातीर आडायल्यात आनी गांवगिऱ्या वाठारांतल्या शिक्षण घेवपी विद्यार्थ्यांचें व्हड लुकसाण केलां. हो प्रकार सामकोच अयोग्य आसा, अशी टिका आदले आमदार आनी संस्थेचे अध्यक्ष नरेश सावळ हांणी कासारपालींत घेतिल्ले पत्रकार परिशदेंत केली.
कासारपालच्या श्री संदीपक शिक्षणीक संस्थेच्या संकुलांत ही पत्रकार परिशद घेतिल्ली. ह्या वेळार सुनील पळ, निशांत चणेकार हांचे सयत संस्थेचे पदाधिकारी तशेंच पालक, कार्यकर्ते हाजीर आशिल्ले.
गांवगिऱ्या वाठारांत भुरग्यांक शिक्षणीक सुविधा निर्माण जावची हे खातीर आमी फाटलीं कितलीशींच वर्सा केजी पासून शाळा सुरू केली. थंय यत्ता पांचवी मेरेनचे वर्ग चलतात. तशेंच आमी यत्ता इकरावीचो वर्ग सुरू करचे खातीर ही परवानगी घेवपाची प्रक्रिया सुरू केल्ली. ताका मुख्यमंत्र्याचें पुराय आदार आनी तेंको आशिल्लो, मात थळाव्या आमदारान माध्यमीक पांवड्याचेर तशेंच उच्च माध्यमीक पांवड्याचेर शिक्षणीक परवाने दिवपा संबंदांत हस्तक्षेप केल्ल्याचो आरोप सावळ हांणी केला.
शिक्षणीक संस्थेंत अशे तरेचो हस्तक्षेप पुराय तरेन चुकीचो आसा. ते खातीर गांवांतले पालक, शिक्षण, विद्यार्थी हांचे व्हड लुकसाण जातलें. अशे तरेचे राजकी असुये खातीर अशे परवाने आडावप आमदाराक सोबा सारकें ना, अशें सावळ हांणी स्पश्ट केलें.
सावळ हांचे आरोप तथ्यहीनः डॉ. शेट्ये
शिक्षणीक संस्थेचे परवाने आडायल्ल्याचो आपल्याचेर केल्लो आरोप तथ्यहीन आसा. त्या प्रकरणा कडेन आपलो कुस्कुटाचो लेगीत संबंद ना. शिक्षणीक संस्थांक मान्यताय दिवप हें शिक्षण खातें आनी संबंदीत मंत्र्याचेर निंबून आसता. मेळिल्ले म्हायती प्रमाण शिक्षण खात्या कडेन विवीध शिक्षणीक मान्यताये खातीर 85 अर्ज आयल्यात. तातूंत आपले संस्थे खातीर आपणेय एक अर्ज केला. परवाने आडयिल्ल्याचो आपल्याचेर जो आरोप केला तो सिद्ध करचो. ह्या प्रकरणांत कायदेशीर सल्लो घेवन फुडलें पावल उखलतलों, अशें आमदार डॉ. चंद्रकांत शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
