उजो पालोवपी दळान एप्रीलांत हाताळ्ळ्यो 63 घडणुको

भांगरभूंय | प्रतिनिधी

41 उज्याच्यो जाल्यार 22 आपत्कालीन घडणुकांचो आस्पाव

पणजीः उजो पालोवपी दळान एप्रील 2024 त 63 घडणुको हाताळ्ळ्यांत. तातूंत 41 उजो पालोवपाच्यो जाल्यार 22 आपत्कालीन घडणुकेचें निवारण दळान केलां. ते भायर ह्या घडणुकांनी 3,05,000 हजार रुपयांच्या मालमत्तेचें लुकसाण जाल्यार जाल्यार 13.9 लाख रुपयांची मालमत्ता वाटोवपाक उजो पालोवपी दळाक येस आयलां. उजो पालोवपी दळान दिल्ले आंकडेवारींतल्यान ही म्हायती मेळ्ळ्या.

63 तल्यो 32 घडणुको उत्तर गोंयांत घडल्यात. तातूंत 21 उजो लागपाच्यो आनी 11 आप्तकालीन घडणुकांचो आस्पाव आसा. दक्षिणेंत 31 घडणुको घडल्यो. तातूंत 20 उज्याच्यो जाल्यार 11 आपत्कालीन घडणुकांचो आस्पाव आशिल्लो.

सगळ्यांत चड 11 घडणुको बार्देस म्हालांत घडल्यो. तातूंत 7 उज्याच्यो जाल्यार 4 आपत्कालीन घडणुकांचो आस्पाव आसा. दुसरे सुवातेर साश्ट म्हाल आसा. साश्टींत 9 घडणुको घडल्यो. तातूंत 7 उज्याच्यो आनी 2 आपत्कालीन घडणुको आसात, अशी म्हायती उजो पालोवपी दळान दिल्या. ह्या घडणुकांनी वट्ट 8 जनावरांक आनी एका मनशाचो जीव वाटोवपाक दळाक येस मेळ्ळां. दिवचल आनी तिसवाडी म्हालांत दरेकी 2 जनावरांचो जीव वाटायलो, जाल्यार पेडणें, सत्तरी, काणकोण, फोंडें म्हालांत दरेकी एका जनावराचो जीव वाटोवपाक दळाक येस मेळ्ळें. साश्ट म्हालांत एका मनशाक वाटायलो जाल्यार तिसवाजी म्हालांत एका जनावराक मरण आयलें, अशी म्हायती दळान दिल्या.

एप्रीलांतली आंकडेवारी

वट्ट घडणुको- 63

उज्याच्यो घडणुको- 41

आपत्कालीन घडणुको- 22