बार्देसाचे चुलीर भाजपाचें आदन

भांगरभूंय | प्रतिनिधी

काँग्रेसी सयत आरजीपीचो उमेदवारांक आकर्शीत करपाचो यत्न

भांगरभूंय । प्रतिनिधी

म्हापशें: उत्तर गोंय लोकसभा मतदारसंघांतल्यान वेंचणूक लडोवपी भाजप, काँग्रेस आनी रिव्होल्युशनरी गोवन्स ह्या तिनूय राजकी पक्षांनी प्रचारांत आघाडी घेवन गांठीभेटी घेवन मतदारांक आपल्या उमेदवारा कडेन आकर्शीत करपाचो यत्न केला. हे खेपेय भाजपाचें आदन बार्देसाचे चुलिरूच निंबून आसा.

भाजपचे उमेदवार सध्याचे केंद्रीय मंत्री श्रीपाद नायक हे सेगीत सवे खेपे जैत मेळपाच्या उद्देशान रिंगणांत देंवल्यात. आदले केंद्रीय कायदो मंत्री अ‍ॅड. रमाकांत खलप हे काँग्रेसीचे उमेदवारीचेर रिंगणांत आसात. जाल्यार फक्त कांय काळांतूच नीज गोंयकारां मदीं सुवात निर्माण केल्लो नवो पक्ष आरजरी पक्षा वतीन पक्ष मुखेली तुकाराम उर्फ मनोज परब वेंचणूक लडयता. तेचवरी बहुजन समाज पार्टी वतीन मिलन वायंगणकार, अखील भारतीय परिवार पार्टी वतीन सखाराम नायक जाल्यार अपक्ष म्हूण थॉमस फर्नांडीस, अ‍ॅड. विशाल नायक आनी शकील जमाल शेख अशे आठ उमेदवार रिंगणांत आसात. पूण प्रचार वावराचो नियाळ घेतलो जाल्यार भाजप आनी काँग्रेस ह्या दोन पक्षां मदींच ही थेट लडत जातली, अशीं चिन्नां दिसतात. आरजी पक्षाच्या मतांचे आघाडेर भाजप आनी काँग्रेसीचो उत्तर गोंयांतलें जैत निंबून आसतलें.

भाजपान आतां मेरेनच्या प्रचारांत आघाडी मेळयल्या. मतदारांच्या गांठीभेटी सयत कोनसो बसका आनी जाहीर सभाय ह्या पक्षांच्यो जाल्यात. मुख्यमंत्री डॉ. प्रमोद सावंत, प्रदेशाध्यक्ष सदानंद शेट तानावडे हांणी मंत्री, आमदारां सयत उत्तर गोंयांतल्या लोकां कडलो संपर्क वाडयला. प्रधानमंत्री नरेंद्र मोदी आनी गृह मंत्री अमीत शाह हांच्यो जाहीर सभा जाल्ले खातीर भाजप कार्यकर्ते आनी फुडारी उमेदी आसात, श्रीपाद नायक हांकां जैतिवंत करपाच्या कामांत ते व्यस्त आसात.

दुसरे वटेन काँग्रेसीचे उमेदवार अ‍ॅड. रमाकांत खलप हांकां उमेदवारी मेळपाक कळाव जावन लेगीत मतदारांच्यो गांठीभेटी तशेंच कोनरो बसकांच्या माध्यमांतल्यान मतदारां कडेन संपर्क सादपाचो यत्न चलयला. नवे आनी आदले पक्ष कार्यकर्ते अ‍ॅड. खलप हांच्या फाटल्यान घट उबे रावल्यात. काँग्रेस प्रदेशाध्यक्ष अमीत पाटकार, आणदार अ‍ॅड. कार्लूस फेरेरा आनी हेर फुडाऱ्यां सयत राष्ट्रीय फुडारी डॉ. शशी थरूर, अलका लांबा, माणिकराव ठाकरे, हर्षद शर्मा हांचे सयत हेर फुडाऱ्यांनी कोनसो बसकांतल्यान मतदारांक पक्ष कडेन आकर्शीत करपाचो यत्न केला.

आरजीपीचे आमदार विरेश बोरकार हांचे वांगडा युवा कार्यकर्त्यांच्या नेटार मनोज परब हांणी उत्तर गोंयांतल्या मतदारांच्यो गांठीभेटी घेवन आरजीक जैतिवंत करपाचो उलो मारला. हेर पांच उमेदवारांनी वैयक्तीक तशेंच सोशल मिडियाच्या माध्यमांतल्यान मतदारां कडेन संपर्क करपाचो यत्न केला.

ह्या लोकसभा मतदारसंघांतल्या स म्हालांतलो बार्देस म्हाल हो सगळ्यांत व्हड म्हाल. बार्देस सयत पेडणें, सत्तरी, दिवचल, तिसवाडी आनी फोंडें म्हालांतलो प्रियोळ अशे मेळून 20 मतदारसंघांचो आस्पाव आसा. बार्देसांतल्या थिवी, म्हापशें, शिवोली, साळगांव, कळंगूट आनी पर्वरी अशे सात मतदारसंघ आसात. फाटले तीन लोकसभा वेंचणुकेचो नियाळ घेतलो जाल्यार कळंगूट आनी हळदोणें सोडून हेर सगळे मतदारसंघ सदांच भाजपा वटेन रावल्यात.

अंदूं पुराय उत्तर गोंय लोकसभा मतदारसंघांत 5 लाख 80 हजार 577 मतदार आसात. तातूंतले बार्देसांतल्या ह्या सातूय मतदारसंघांत 1 लाख 69 हजार 332 मतदार आसात. तिसवाडींतल्या पांच मतदारसंघांनी 1 लाख 31 हजार 391, दिवचलच्या तीन मतदारसंघांनी 85,986, सत्तरींतल्या दोन मतदारसंघांत 66,236, पेडणेंच्या दोन मतदारसंघांत 66,689 जाल्यार फोंडें म्हालांतल्या प्रियोळ मतदारसंघांत 31,220 मतदारांचो आस्पाव आसा.

2014 चे वेंचणुके वेळार बार्देस म्हालांतल्या सात विधानसबा मतदारसंघांतले स भाजपा कडेन जाल्यार वर्वरी हो भाजपा सरकाराक तेंको दिल्ल्या अपक्ष आमदारा कडेन आशिल्लो. त्या वेळार काँग्रेस पक्षाच्या ताब्यांत एकूय मतदारसंघ नाशिल्लो. हे खेपेय अशीच स्थिती आसा. सांतांतलो एक आमदार काँग्रेसी कडेन जाल्यार स आमदार भाजपा कडेन आसात.

2014 चे लोकसभेंत भाजपाक 76,880 आनी काँग्रेसीक 43,014 मतां मेळिल्लीं. भाजपाक ह्या म्हालांतल्यान 33,866 मतांची आघाडी मेळिल्ली. 2019 त बार्देसांतल्यान भाजपाक 74,086 जाल्यार काँग्रेसीक 63,131 मतां मेळिल्लीं. जाल्यार भाजपाक 10,955 मतांची आघाडी मेळिल्ली.

2009 त भाजपाक 47,583 जाल्यार काँग्रेसीक 41,911 मतां मेळिल्लीं आनी भाजपाक 5,672 मतांची आघाडी मेळिल्ली.

2009 त भाजपाचे श्रीपाद नायक हे 6,353 मतांची आघाडी घेवन जिखून आयिल्ले. त्या वेळार बार्देस म्हालान तांकां साल्वार केल्लो. तांचे आड काँग्रेसीचे जितेंद्र देशप्रभू वेंचणूक रिंगणांत आशिल्ले.

2014 त काँग्रेसीचे रवी नायक हांचेर श्रीपाद नायक हांणी 1 लाख 5 हजार 599 मतांनी जैत जोडिल्लें. तेन्ना भाजपाक बार्देसांतल्यान 33,866 मतांची आघाडी मेळिल्ली. 2019 त श्रीपाद नायक हांणी काँग्रेसीचे उमेदवार गिरीश चोडणकार हांचेर 79,309 मतांची आघाडी घेवन जैत मेळयिल्लें. हे वेंचणुकेंत बार्देसांतल्यान भाजपाक 10.955 मतांची आघाडी मेळिल्ली.