भांगरभूंय | प्रतिनिधी
उत्तर गोंयचे उमेदवार रमाकांत खलप हांची आरोप करप्यांक जाप
पणजी: म्हापसा अर्बन बँक हांवें न्हय, जाल्यार म्हजेर आरोप करप्यांनी लुटली अशी परती जाप काँग्रेसीचे उत्तर गोंयचे उमेदवार अॅड. रमाकांत खलप हांणी दिली. म्हापसा अर्बन बँके वेल्यान म्हजेर फटीचे आरोप करपी मुख्यमंत्र्याक हें सोबना. तांणी हे खातीर राजिनामो दिवंक जाय अशेंय तांणी म्हणलें.
गोंयाक 1987 वर्सा राज्याचो दर्जो मेळ्ळो, त्या वेळार केंद्र गोंय-दमण-दीव अशेंच आशिल्लें. ताका लागून म्हापसा अर्बन आनी गोवा स्टेट कॉपरेटिव्ह ह्या दोन बँकांक मल्टिस्टेट बँकेचो दर्जो मेळ्ळो. गोवा स्टेट कॉपरेटिव्ह बँकेच्या एका कर्जदाराचेर सरकारान वसुली खातीर खटलो दाखल केल्लो. त्या वेळार थळाव्या सरकाराच्या निबंधकाक वसुली खातीर खटलो दाखल करपाचो अधिकार ना असो आक्षेप तांणी घेतिल्लो. पूण तेन्नाचे निबंधक आपले भुमिकेचेर ठाम रावले. ताका लागून हें प्रकरण सहकार लवाद, उच्च न्यायालय आनी उपरांत सर्वोच्च न्यायालयांतूय पाविल्लें. हातूंत तेरा वर्सां फुकट गेलीं. ताका लागून बँक सुमारेक शंभर कोटीच्या एनपीएंत गेली. उपरांत रिझर्व्ह बँक ऑफ इंडियान नवे निकश लागू केले आनी एनपीए विशीं फायदो-लुकसाण पत्रकांत येवजण करपाचे निर्देश जारी केले.
त्याच वेळार काँग्रेस सरकार वचून राज्यांत भाजपाचें सरकार स्थापन जाल्लें. ह्या सरकारांतले आदले मुख्यमंत्री सर्गेस्त मनोहर पर्रीकार आनी हेरांनी बोवाळ घालून लोकांक पयशे काडपाक लायले. ताका लागून आपणें स्वता पर्रीकार हांकां पत्र बरोवन बँक सरकाराच्या ताब्यांत घेवपाक सांगिल्लें अशें खलप हांणी म्हणलें.
उपरांतूय ही बँक ताब्यांत घेवन तांणी ती पांच वर्सां चलयली. ह्या काळांत एनपीए शंबरा वेल्यान देडशे कोटींचेर गेल्लो. उपरांत परतून काँग्रेस सत्तेंत आयले उपरांत पर्रीकार हांणी बँकेंत भरती केल्ले सगले जाण पळून गेले. फक्त आपले विशींच्या राजकी आकसाक लागूनच भाजपान ही बँक बुडयली असो आरोप रमाकांत खलप हांणी केलो.
म्हापसा अर्बन बँकेंतल्यान हांव, म्हजे कुटूंब तशेंच इश्टांनी पयशे काडिल्ले नात. मुख्यमंत्र्यांनी निमाणें प्रतिज्ञापत्र तपासचें आनी उपरांतूच आरोप करचो. तांच्या सरकारान केल्ली कृत्यां भायर काडत जाल्यार तांकां नाकापुरो जातलें अशें रमाकांत खलप हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
