भांगरभूंय | प्रतिनिधी
लिंबू उदक, शितपेय आनी हेर वेवस्था पुरयतले: रमेश वर्मा
पणजी: गोंयांत उत्तर गोंय आनी दक्षीण गोंय लोकसभा मतदारसंघा खातीर मंगळारा 7 मे दिसा मतदान जातलें. ह्या वेळार मतदारांक मतदाना वेळार गरमेचो त्रास जावचो न्हय म्हूण दरेक केंद्रार वैजकी सुविधां सयत लिंबू उदक आनी शितपेय, उदक आनी हेर वेवस्था केल्या. तशेंच अंदूं 80 टक्के परस चड मतदान जावपाचो विस्वास मुखेल वेंचणूक अधिकारी रमेश वर्मा हांणी उक्तायलो. ते पणजेंत पत्रकार परिशदेंत उलयताले. ह्या वेळार पुलीस म्हानिरिक्षक ओमवीर सिंग बिश्णोई, उत्तर गोंय जिल्होधिकारी तशें वेंचणूक अधिकारी डॉ. स्नेहा गीते (आयएएस) आनी दक्षीण गोंय जिल्होधिकारी तशेंच वेंचणूक अधिकारी अश्वीन चंद्रू (आयएएस) हाजीर आशिल्ले.
गोंयांत उत्तर आनी दक्षीण गोंय लोकसभा मतदारसंघा खातीर मंगळारा मतदान जातलें. तातूंत उत्तर गोंयांत 5,80,710 जाल्यार दक्षीण गोंयांत 5,98,934 मेळून 11,79,844 मतदार आसात. पूण फाटले फावटी लोकसभा वेंचणुकेंत सुमार 75 टक्के मतदान जाल्लें. अंदूं 80 टक्के मतदान जावपाचो विस्वास आसा. तशेंच गोंयांत उत्तर गोंयांत 863 जाल्यार दक्षीण गोंयांत 862 मेळून 1,725 मतदान केंद्रां आसात. तातूंत बायलां खातीर पींक मतदान केंद्र, पर्यावरणीय स्थिरतायेक प्राधान्य दिवपा खातीर दोनूय जिल्ह्यांत दरेकी 20 मेळून 40 मतदान केंद्रां आसात. तेच बरोबर 110 मॉडेल मतदान केंद्रां, दिव्यांगा खातीर पांच मतदान केंद्रां, पोरण्या दायज (हेरिटेज) सुवातेंत आशिल्ले मतदान केंद्राचें वेगळेपण तिगोवपा खातीर युनीक मतदान केंद्रां उबारल्यांत अशीं राज्यांत 229 मतदान केंद्रा आशिल्ल्याची म्हायती मुखेल वेंचणूक अधिकारी वर्मा हांणी दिली.
मतदारांक मतदाना वेळार गरमेचो त्रास जावचो न्हय म्हूण दरेक केंद्रार वैजकी सुविधे सयत लिंबू उदक आनी शितपेय, उदक आनी हेर वेवस्था दवरल्या. तशेंच केंद्रांत कांय सुवातांनी एम्बुलन्सी सयत वैजकी सुविधेची वेवस्था दवरल्या. तशेंच राज्यांत अर्बन तशेंच मुळावी भलायकी केंद्रां खंयच्याय आपत्कालीन सेवे खातीर तयार दवरल्यांत.
मतदान पूर्व वेवस्था आनी मतदान प्रक्रियेचे साक्षिदार जावपा खातीर वेंचणूक वेवस्थापन संस्थेचे आंतरराष्ट्रीय प्रतिनिधी राज्यांत दाखल जाल्यात. तातूंत भुतान आनी मंगोलीया देशांतले प्रतिनिधी आसात. तशेंच भुतान आनी इस्रायलांतले पत्रकारूय गोंयांत दखल जाल्यात. ते पांच ते आठ मे मजगतीं राज्यांत वेंचणूक प्रक्रियेचे साक्षिदार जातले.
लोकसभा वेंचणूक हो मतदारांचो महोत्सव आसून राज्यांतले थळावे समस्येक लागून मतदानाचेर बहिश्कार घालपाची शक्यतायेची दखल घेवन दोनूय जिल्ह्यांत वेंचणूक अधिकाऱ्यां सयत हेरांनी संबंदीत मतदाराची चर्चा करून तांकां मतदान करपाक प्रोत्साहन केल्ल्याची म्हायती मुखेल वेंचणूक अधिकारी वर्मा हांणी दिली.
पर्यावरणीय स्थिरतायेक प्राधान्य दिवपा खातीर दरेक मतदान केंद्रांत अधिकारी पांच झाडां लायतले. तशेंच उत्तर गोंयांत वारखंड, दक्षीण गोंयांत वार्का, नावेली जंक्शन आनी काणकोण बायपासा कुशीच्या राष्ट्रीय म्हामार्गार मतदारांक वृक्षारोपण करतले. हाची देखभाल रान खातें करतले अशी म्हायती मुखेल वेंचणूक अधिकारी वर्मा हांणी दिली.
वेंचणूक मुक्त, निश्पक्ष आनी इश्टागतीच्या वातावरणांत जावपा खातीर राज्यांत गरजेचे ते पुलीस तैनात केल्यात. कायदो आनी सुवेवस्थेचो प्रस्न निर्माण जावचो न्हय म्हूण पयलेच फावटी दरेक मतदारसंघांत क्षेत्रीय तशेंच पर्यावेक्षक अधिकारी म्हूण पुलीस उपअधिक्षकांची नेमणूक केल्या. तशेंच हेर पुलीस अधिकाऱ्या सयत केंद्रीय सशस्त्र पुलीस पंगड तैनात केल्यात. तेच बरोबर नागरिकांनी मतदान केंद्रांत मोबायल तशेंच हेर इलेक्ट्रोनीक यंत्रणा व्हरपाक मेळचें ना अशी म्हायती पुलीस म्हानिरिक्षक ओमवरी सिंग बिश्णोई हांणी दिली.
गोंयांत आचारसंहितेच्या उल्लंघनाच्यो 31 कागाळी आयल्यात. तातूंतल्यो तीन सोडून हेर कागाळी निवारण केल्यात. तशेंच दोन नागरी सेवेचे तशेंच दोन पुलीस सेवेचे मेळून चार कर्मचाऱ्यांक निलंबीत केल्यात.
गोंयांत 16 मार्च ते 29 एप्रील मजगतीं आयकार विभाग, अबकारी, पुलीस आनी हेर यंत्रणेन 17 कोटी 12 लाख 9 हजार 948 रुपया रोख रक्कम, ड्रग्स, सोरो, भांगर आनी हेर वस्तू जप्त केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.