भांगरभूंय | प्रतिनिधी
1
आयच्या काळांत इल्लें
व्याकरण बदलूंक लागलां
मुक्त म्हणटाले तें
युक्त जावंक लागलां.
2
इंडिवाल्यांक दिसता
इडीचो भंय
वाटावंक शकता तांकां
फकत भाजपाचीच वंय
3
जळांत भोंवता मासोळी
वार्यांत भोंवती पिसोळीं
आनी आमी जळींमळीं
मासोळी पडटा जाळांत
पिसोळींय पडटी जाळांत
आनी आमी रमतात भुतकाळांत.
4
सेक्युलरांक मत मारात
बिस्मसायबान मारलो उलो
आयकून उमेदवार
स्वामी मठांत धांवलो.
5
बँक एक बुडली आनी
केंस आमचे धवे
तयार तो खेळूंक
खेळ आतां नवे.
6
हातांतलो झाडू कितें
निवळ करता कळना
सोर्याचो दुडू गेलो
कोणा बोल्सांत कळना.
7
संविधान थापलें माथ्यार
कॉंग्रेसचो उमेदवार सांगता
आनी नेहरुंची निंदा करपी
बेठेच बाबडे दुख्खी जातात.
8
दर? फावट येता तेन्ना
‘प़क्का घरा’चें उतर दिता
फाट परतिता म्हणल्यार
घरां मोडची ऑर्डर येता.
9
काँग्रेसचे माचयेर रावन
आपल्याच खासदाराक ते शिणटात
कोण सांगतलो कोणाचीं
पाळां ते खणटात?
10
मतां खातीर कोणाचेय
धरचे पडटात पांय
उजवे आसूं, आसूं दावे
मतां खातीर सगळेच जाय.
11
उमेदवारां कडल्यान खंय
मेळणा व्हिटामीन ‘एम’
हात ओले केलेना तर
बसतलो कसो ‘जम’.
12
धोंपरांक बांदून बाशींग
बिल्ली वचूंक सोदता दिल्ली
चारूच दिसांनी कळपाचें
कोण दिल्ली आनी कोण गल्ली.
13
परत एकदां वयर सरता
कोंकणी मराठी वाद
कितल्यो म्हणून करतले काय
पिळग्यो हे बाद?
– शणैमाम
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
