भांगरभूंय | प्रतिनिधी
1963- 1999 मेरेन 21 स्वातंत्र्य सैनीक, 3 साहित्यीक देंविल्ले रिंगणांत
भांगरभूंय । प्रतिनिधी
पणजीः गोंयांत 1963 ते 1999 ह्या काळांत जाल्ली लोकसभा वेंचणूक 21 स्वातंत्र्यसैनिकां सयत तीन साहित्यिकांनी विवीध पक्षां वतीन लडयल्ली. 1999 उपरांत मात एकाय स्वातंत्र्य सैनिकान वा साहित्यिकान लोकसभेची वेंचणूक लडोवंक ना.
1999 आदींच्या लोकसभा वेंचणुकांनी विचारवंत आशिल्ल्या स्वातंत्र्य सैनिकांक तशेंच साहित्यिकांक वेंचून दिवन लोकसभेंत धाडपांत विवीध राजकी पक्षांत रस आशिल्लो. गोंयचे भुंयेंतलो पयलो थळावो पक्ष आशिल्ल्या मगो पक्षान 1999 आदींच्या वेंचणुकांनी खूबश्या स्वातंत्र्य सैनिकांक आनी साहित्यिकांक उमेदवारी दिल्ली. ते उपरांतच्या काळांत मात राजकी पक्षांनी स्वातंत्र्य सैनीक आनी साहित्यां कडेन आडनदर करून पयसो, प्रतिश्ठा आनी जिखून येवपाची पात्रताय अशे तीन निकश लक्षांत घेवन उमेदवारी दिवपाक सुरवात केली. मजगतीं, 1999 आदीं ज्या 21 स्वातंत्र्य सैनीक आनी तीन साहित्यिकांनी लोकसभा वेंचणुको लडयल्ल्यो, तातूंत सगळ्यांत चड सात वेंचणुको जनार्दन शिंक्रे हांणी लडयल्यो. ते उपरांत थॉमस डायस हांणी 6 वेंचणुको लडयल्यो. फेलिक्स रॉड्रिग्स आनी पुरुषोत्तम काकोडकार 3 खेपे, पिटर आल्वारीस, नारायण राव आनी शिवाजी देसाय दरेकी दोन खेपे वेंचणूक रिंगणांत देंवले. जाल्यार हेरांनी मात एकेच खेपे वेंचणुकेक फुडो केलो. त्या काळांत शंकर भंडारी, मनोहरराय सरदेसाय आनी रवीन्द्र केळेकार ह्या व्हड साहित्यिकांनी लेगीत लोकसभा वेंचणूक लडयली. तातूंत केळेकार हांणी दोन खेपे वेंचणूक लडयली. हेर दोगांनी मात एकेकदाच वेंचणूक लडोवप पसंत केलें.
लोकसभा वेंचणूक लडयल्ले स्वातंत्र्य सैनीक आनी साहित्यीक
स्वातंत्र्य सैनीक
डॉ. पुंडलीक गायतोंडे (काँग्रेस)
पीटर अल्वारीस (मगो)
जनार्दन शिंक्रे (मगो)
लॉरा सोझा दी रॉड्रिग्स (काँग्रेस)
आत्माराम करमलकार (काँग्रेस)
विश्वनाथ लवंदे (मगो)
नारायण देसाय (सीपीआय)
फेलिक्स रॉड्रिग्स (मगो)
पुरुषोत्तम काकोडकार (काँग्रेस)
जॉन डिसोझा (मगो)
माधव बीर (एनसीओ)
नारायण राव (मगो)
पां. पु. शिरोडकार (मगो)
शिवाजीराव देसाय (बीएलडी)
आर्सेनियो जॅकीस (जेएनपी)
थॉमस डायस (मगो)
जॉर्ज वाझ (सीपीआय)
ज्याकीम डायस (मगो)
नारायण पालेकार (सीपीआय)
उर्सेलिना आल्मेदा (जेडी)
ग्लोरियो फुर्तादो (मगो)
साहित्यीक
शंकर भंडारी (मगो)
मनोहरराय सरदेसाय (मगो)
रवीन्द्र केळेकार (मगो)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.