भांगरभूंय | प्रतिनिधी
दुबावितां कडल्यान 8 लाख रुपया जप्त; चवगांक सशर्त जामीन
भांगरभूंय । प्रतिनिधी
पणजीः म्हायती आनी तंत्रज्ञान (आयटी) मॉनिटरींग विभागांत सेवा दिवपी आयकर अधिकारी आशिल्ल्याचें भासोवन दोगा ज्येश्ठ वेवसायिकां कडल्यान 16 लाख रुपया लुटिल्ले. तातूंतले 8 लाख रुपया जप्त केल्यात. जाल्यार ह्या प्रकरणाच्या चवकशी वेलार खरी म्हायती दिवंक नाशिल्ल्यान हवालदार विनायक कळंगूटकार आनी कॉन्स्टेबल आनंद नायक ह्या दोगा पुलिसांक निलंबीत केल्यात मजगतीं, अटक केल्ल्या चवगांक वास्को प्रथमवर्ग न्यायालयान सशर्त जामीन मंजूर केला.
ह्या प्रकरणांत करंझाळे रावपी गाझियाबाद- उत्तर प्रदेशांतले ज्येश्ठ वेवसायीक अशोक चौधरी हांणी कागाळ दाखल केल्या. चौधरी हांणी दक्षीण गोंयांत केळशी वाठारांत जमीन घेतल्या. ते जमनीचें रुपांतर आनी हेर प्रक्रिया करचे खातीर 31 मार्चाक ते पवनकुमार वर्मा हाचे वांगडा गोंयांत आयिल्ले. जमीन रुपांतर आनी हेर प्रक्रिया करचे खातीर तांणी दाबोळी रावपी इश्ट यशवंत कृष्णय्या हाचे कडल्यान 16 लाख रुपया घेतले. ते उपरांत ते दोगूय भाड्याची टॅक्सी करून तांच्या करंझाळेच्या घरा वचपा खातीर भायर सरले. हे मजगतीं, दक्षीण गोंय जिल्होधिकाऱ्याच्या कार्यालयांत म्हायती आनी तंत्रज्ञान (आयटी) मॉनिटरींग विभागांत सेवा दिवपी वीज खात्यांतलो कनिश्ठ लिपीक नितेश नायक हाका इश्ट चंदन हाचे कडल्यान कोणतरी व्हड प्रमाणांत पयशे घेवन मोटारींतल्यान वता अशी म्हायती मेळिल्ली. ते प्रमाण नितेश नायक हाणें चंदनान आपोवन घेतलो आनी दाबोळी विमानतळार गेलो. ते उपरांत दाबोळी मतदारसंघांतल्या वेल्स जंक्शन वाठारांत नितेश नायक हाणें आपूण आयकर मॉनिटरींग विभागाचो अधिकारी आशिल्ल्याचें भासोवन अशोक चौधरी आनी ताचो सागाती पवनकुमार वर्मा हांची गाडी आडायली. ते उपरांत ताणें चौधरी हाचे गाडयेंत आशिल्ले पयशे झोमून घेवन थंयच्यान पळून गलो. कागाळदाराक दुबाव आयले उपरांत ताणें नितेश नायक हाचे गाडयेचो फाटलाव केलो. हाची म्हायती नितेशाक मेळ्ळी. ते उपरांत ताणें कागाळदाराक परतून आडावन ताका जाब विचारलो. त्या वेळार चवकशी करचे खातीर वास्को पुलीस स्टेशनांत वचपाक ताणें सांगलें. ते प्रमाण नितेश नायक कागाळदाराच्या फाटोफाट वास्को स्टेशना मेरेन आयलो. ते उपरांत कागाळदारान हाची म्हायती वास्को पुलिसांक दिली. हे मजगतीं, नितेश नायक थंय आयलो आनी ताणें संबंदीत पुलिसांक गाडयेंत रोख रकम सांपडिल्ल्याची म्हायती दिवन घोळट्या पंगडाक आपयिल्ल्याची म्हायती दिली. ते उपरांत थंय घोळटो पंगड पावलो. नितेश हाणें रोख रकम जप्त केल्ल्या संबंदांत व्हिडीयो रेकॉर्डींग करपाची गरज आशिल्ल्याची म्हायती दिवन थंयच्यान गेलो. कागाळदारान ताचो फाटलाव केलो, तेन्ना कांय अंतराचेर गेले उपरांत त्या दोगांची गाडी तांचे नदरेंतल्यान सुटली. ते उपरांत कागाळदार करंझाळेच्या तांच्या फ्लॅटाचेर गेल्ल्याची म्हायती कागाळदारांनी दिली.
कागाळेची दखल घेवन दक्षीण गोंय पुलीस अधिक्षक सुनिता सावंत आनी उपअधिक्षक संतोष देसाय हांच्या मार्गदर्शना खाला वेर्णेचे पुलीस निरिक्षक मेल्सन कुलासो हांणी चवकशी केले उपरांत गुन्यांव दाखल केलो. ते उपरांत पुलिसांनी ह्या प्रकरणांत नितेश नायक (34. रा. वास्को) हाचे सयत दाबोळी घोळट्या पंगडाचो अधिकारी अनिरुद्ध पवार (41, रा. नावेली), केशव खवणेकार (48. रा. मुरगांव आनी चंदन यादव (37. रा. सांकवाळ) ह्या चवगांक बुधवारा राती अटक केली. ते उपरांत पुलिसांनी नितेश आनी अनिरुद्ध ह्या दोगां कडल्यान दरेकी चार लाख रुपया मेळून 8 लाख रुपया जप्त केले.
मजगतीं, पुलीस कोठडे खातीर चारूय जाणांक बिरेस्तारा सांजे वेळार वास्कोच्या प्रथमवर्ग न्यायालयांत हाजीर केले. ह्या वेळार दुबावितां वतीन अॅड. अमेय प्रभुदेसाय हांणी बाजू मांडली आनी दुबावितांक नोटीस दिनासतना अटक केल्ल्याचो युक्तीवाद केलो. तशेंच पुलिसांनी कारवाय करतना योग्य प्रक्रिया करूंक नाशिल्ल्याचो दावो केलो. ह्या प्रकरणांत न्यायालयान दोनूय पक्षांची बाजू आयकून घेतले उपरांत चारूय दुबावितांक सशर्त जामीन मंजूर केलो.
ह्या प्रकरणांत आयकर खात्या कडल्यान म्हायती मेळ्ळे उपरांत दक्षीण गोंय जिल्होधिकारी आश्वीन चंद्री (आयएएस) आनी पुलीस अधिक्षक सुनिता सावंत हांणी म्हायती आनी तंत्रज्ञान (आयटी) मॉनिटरींग विभागांत सेवा दिवपी नितेश नायक आनी दाबोळी घोळट्या पंगडाचो अधिकारी अनिरुद्ध पवार हांचे सयत घोळट्या पंगडांत सेवा दिवपी हवालदार विनायक कळंगूटकार आनी कॉन्स्टेबल आनंद नायक ह्या पुलिसांची मुळावी चवकशी केल्ली. त्या वेळार वयल्या प्रकरणाची म्हायती दिवंक नाशिल्ली. हाची दखल घेवन पुलीस अधिक्षक सुनिता सावंत हांणी दोगा पुलिसांक निलंबीत केले. द्या वेळार घडणूक घडिल्ली, त्या दिसा विनायक कळंगूटकार हाचो वाडदीस आशिल्लो. ह्या संबंदांत ताणें अनिरुद्ध पवार हाका म्हायती दिवन रातीं उसरां येवचे खातीर परवानगी घेतिल्ली. ते प्रमाण तो रातच्या 11 वरांचेर वास्कोच्या विशाल मेगा मार्टा लागसार गाडयेंत बशिल्लो. त्या वेळार अनिरुद्धान ताचे कडेन एक पार्सल दिवन ताच्या घरा दवरपाक सांगिल्लें. त्या वेळार ताणें न्हयकार दिलो, जाल्यार दुसरो पुलीस आनंद नायक हाका सेवेंत रुजू जावन एक म्हयनोय जावंक ना. अनिरुद्ध आनी नितेश हांचे मदीं कसलें तरी बेकायदो काम जाता अशी म्हायती आनंद नायक हाका आशिल्ली. अशें आसतनाय दोगांनीय मुळावे चवकशेंत कसलीच म्हायती दिवंक नाशिल्ल्यान त्या दोगांचेर कारवाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
