हेर भाशेंतलें साहित्य हांव कोंकणींत हाडूंक शकलें हाची खोस जाता: सुनेत्रा

भांगरभूंय | प्रतिनिधी

अणकाराच्या मळार आपलें मोलादीक योगदान कोंकणी आनी मराठी साहित्याक दिवपी नामनेची लेखिका/ अनुवादक सुनेत्रा जोग हांकां साहित्य अकादमीचो अणकारा खातीरचो पुरस्कार फावो जाला. तांणी मालती राव हांची कादंबरी कोंकणींत हाडल्या आनी ‘अस्ताव्यस्त बायलो’ अशें नांव दिल्ल्या ह्या पुस्तका खातीर तांकां हो पुरस्कार फावो जाला. तांणी आतां मेरेन इकरा पुस्तकां कोंकणींत अणकारीत केल्यांत, जाल्यार चार मराठींत. नामनेची लेखिका सुधा मूर्ती हांचींय पुस्तकां तांणी कोंकणींत हाडल्यांत. कोंकणी साहित्यांत तांणी हेर भाशांतल्या साहित्याची भर घाल्या आनी वाचकांक वेगवेगळे साहित्य प्रकार वाचपाक दिल्यात. तांच्या ह्या योगदाना खातीर तांकां हेर संस्थांचेय पुरस्कार फावो जाल्यात. तांच्या अणकार साहित्य प्रवासा विशीं आमच्या प्रतिनिधीन जाणून घेवपाचो यत्न केलो तेन्ना तांणी सांगलें:

‘अस्ताव्यस्त बायलो’ हें पुस्तक तुमी केन्ना अणकारीत केल्लें आनी ह्या पुस्तकाक साहित्य अकादमीचो पुरस्कार मेळिल्ल्यान कशें दिसता?
हें पुस्तक हांवें 2018 वर्सा केल्लें. ह्या पुरस्कारांतल्यान म्हज्या अणकाराच्या योगदानाची म्हाका पावती मेळिल्लेवरी मेळ्ळ्या आनी ते खातीर खोस जाल्या. कोंकणी साहित्यांत हांव हेर भाशांतल्या साहित्याची भर घालतां हाचो आनंद म्हाका सदांच मेळटा.
तुमी आतां मेरेन कितलीं पुस्तकां अणकारीत केल्यांत आनी आनीक खंयच्या पुस्तकांचें अणकाराचें काम चल्लां?
हांवें आतां मेरेन इकरा पुस्तकां कोंकणींत अणकारीत केल्यांत आनी चार मराठींत. हे मुखार मराठींत आनीक दोन पुस्तकां प्रकाशीत जावपाचीं आसात.
तुमी चडशे अणकार हे इंग्लिशींतल्यान कोंकणींत हाडपाचे केल्यात, हो अणकार कितलो सोंपो आनी कितलो कठीण आसता?
साहित्य इंग्लिशींतल्यान कोंकणींत हाडटना तशें सोंपें आसना. लेखक आपल्या लिखाणांतल्यान नेमकें कितें म्हुणपाक सोदता हें हांवें वाचकांक दिवप गरजेचें आसता. ते खातीर पयलीं तें सारकें समजून घेवन कितेंय कळना जाल्यार ताचो अर्थ सोदप आनी उपरांतच तें अणकारीत करप सारकें आसता. ते खातीर शब्दकोश पळयतां आनी हेर माध्यमांतल्यान समजून घेवन मागीरच बरयतां. केन्नाकन्नाय गूगलाचेर सोदचें पडटा. म्हाका स्पश्ट जातकरच हांव मुखार वतां.
केन्नाय लेखकाचो संदेश कितें तो कळ्ळो ना जाल्यार तांचे कडेन संपर्क बी करचो पडटा?
तशें केन्ना जावंक ना. पूण एका गुजराती लेखकाचें इंग्लिश पुस्तक अणकारीत करतना म्हाका संपर्क करचो पडलो, कित्याक तर ताच्या लिखाणांत कांय गुजराती उतरां आशिल्लीं. तांणी म्हाका वेवस्थीत सहकार्य केलें. म्हाका जे प्रस्न आशिल्ले ताचे विशीं ते बरे तरेन सांगताले. हे खातीर हें पुस्तक अणकारीत करतना लेखका कडेन संपर्क करप हें म्हाका खूब बऱ्याक पडलें.
सुधा मूर्तीचीं कितलीं पुस्तकां तुमी अणकारीत केल्यांत आनी तांचें साहित्य अणकारीत करताना कठीण दिसलें?
तांचीं सात पुस्तकां हांवें अणकारीत केल्यांत. तांचें साहित्य अणकारीत करतना कसलेच त्रास पडूंक ना. ती स्वता खूब सादी आनी तांणी भास वापरल्या ती लेगीत सारकी सादी वापरल्या. तांचें खंयचेंच पुस्तक अणकारीत करताना म्हाका त्रास जावंक ना.
नवे पिळगेन पुस्तकां वाचचीं म्हूण कितें करचें अशें दिसता?
भुरग्यां मदीं वाचनाची गोडी लावपाची गरज आसा. पयलीं म्हणल्यार आमी जेन्ना तांकां गिफ्टां दितात तीं पुस्तकांच दिवचीं. तांकां आपसूक वाचन करीन दिसतलें.