भांगरभूंय | प्रतिनिधी
मुख्यमंत्री, श्रीपाद नायक हांचो हस्तक्षेप नाशिल्ल्याचें स्पश्टीकरण
भांगरभूंय । प्रतिनिधी
दिवचलः रुद्रेश्वर देवस्थान समिती आनी सांतेरी देवस्थान समिती हांचे मदल्या म्हाजनकी वादाचेर निर्णायक उपाय काडपाक उपजिल्होधिकारी रमेश गांवकार हांची मध्यस्थी येसस्वी जाली. बुधवारा जाल्ले संयुक्त बसकेंत चर्चा केले उपरांत दोनूय गटां वतीन म्हाजनकी वादाचेर उपाय काडिल्ल्याचें दोनूय गटांनी घेतिल्ल्या वेगवेगळ्या पत्रकार परिशदांनी जाहीर केलें.
मजगतीं, रुद्रेश्वर देवस्थान प्रकरणांत मुख्यमंत्री डॉ. प्रमोद सावंत तशेंच केंद्रीय मंत्री श्रीपाद नायक हांचो कसलोच हस्तक्षेप नाशिल्लो आनी ना, अशें सांतेरी देवस्थानाचे अध्यक्ष गीतेश मळीक तशेंच रुद्रेश्वर देवस्थानाचे अध्यक्ष यशवंत माडकार हांणी ह्या वेळार स्पश्ट केलें.
सांतेरी देवस्थानाचे अध्यक्ष गीतेश मळीक, उपाध्यक्ष प्रकाळ मळीक, सचीव लक्ष्मण मळीक हांणी म्हायती दितना सांगलें, 7 एप्रीलाक जो प्रकार जालो ताचेर संयुक्त बसका जाली. तातूंत वाद सोंपोवपाचेर एकमत जालें. ते प्रमाण दोनूय गटांनी आपल्या हक्का विशीं आपापले जे अधिकार आसात ते करपाचे थारलें. ताका लागून दोनूय गटां मदीं हे फुडें वाद जावचो ना, अशी हमी सांतेरी देवस्थान पदाधिकाऱ्यांनी ह्या वेलार दिली. तशेंच जें प्रकरण जालें तातूंत मुख्यमंत्री जॉ. प्रमोद सावंत तशेंच केंद्रीय मंत्री श्रीपाद नायक हांणी कसलोच हस्तक्षेप करूंक नाशिल्लो. गरजे भायर कसलोच गैरसमज करून घेवचो न्हय, अशें गीतेश मळीक हांणी मागलें.
रुद्रेश्वर देवस्थान समितीचे सचीव सुभाष किनळकार हांणी पत्रकार परिशदेंत म्हायती दितना सांगलें, पालखे वेळार जो वाद जालो ते संबंदांत प्रशासक तशेंच उपजिल्होधिकारी रमेश गांवकार हांणी दोनूय गटांक आपोवन चर्चा केली. ह्या वेळार दोनूय गटां मदीं जे मतभेद आशिल्ले ताचेर तांणी उपाय काडलो. मात ह्या संबंदांत आमच्या समाज भावां कडेन विचार विनिमय करून आमची फुडली भुमिका जाहीर करतले, अशेंय तांणी स्पश्ट केलें. अध्यक्ष यशवंत माडकार हांणी सांगलें, देवस्थानाचो जो वाद जालो ते संबंदांत दोनीय वटांनी निर्णायक उपाय काडला. हातूंत कसलोच राजकी हस्तक्षेप नाशिल्लो वा मुख्यमंत्री डॉ. सावंत तशेंच केंद्रीय मंत्री नायक हांचोय कसलोच हस्तक्षेप नाशिल्लो, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
