भांगरभूंय | प्रतिनिधी
-रशियन नागरिकाक अटक, एएनसीची कारवाय
पणजी: गोंय पुलिसांच्या घुंवळे वखदां विरोधी पंगडान (एएनसी) हरमलां धाड घालून व्हड कारवाय केल्या. हे कारवायेंत 1 कोटी 69 लाख 47 हजार रुपया मोलाचो उच्च उच्च दर्जाचो सायलोसायबीन मॅजीक मशरूम आनी हेर ड्रग्ज जप्त केल्ले. राज्यांतली ही सगल्यांत व्हड कारवाय आसा. हे संदर्भांत एएनसीन एवजिनी मोर्कोवीन (33) ह्या रशियन नागरिकाक अटक केल्या.
घुंवळे वखदां विरोधी पंगडान (एएनसी) दिल्ले म्हायती प्रमाण, मदलोवाडो – हरमला बिराडाक रावपी विदेशी नागरीक ड्रग्ज तस्करेंत घुस्पिल्ल्याची म्हायती एएनसीच्या एका अधिकाऱ्याक मेळिल्ली. ते प्रमाण एएनसीचे अधिक्षक बॉसिएट सिल्वा आनी उपअधिक्षक नेर्लोन आल्बुकर्क हांच्या मार्गदर्शना खाला पुलीस निरिक्षक संजीत पिल्ले हांच्या फुडारपणा खाला उपनिरिक्षक सुनील फालकार आनी पंगडान बुधवार 27 दिसा सांजे 3.45 ते राती 8.30 वरां मजगतीं, मदलोवाडो-हरमला एका बिराडाचे कुडीत धाड घातली. त्या वेळार पंगडान एवजिनी मोर्कोवीन (33) ह्या रशियन नागरिकाक ताब्यांत घेवन कुडीची झडटी घेतली. त्या वेळार एएनसीन 218 ग्रॅम सायलोसायबीन मॅजीक मशरूम आनी 2 किल गांजो जप्त केलो. दुबाविताची अदीक चवकशी केली, तेन्ना ताणें कवचेच्या आयदनांत सायलोसायबीन मशरूमाची लागवड केल्ल्याची म्हायती दिली. ते प्रमाण एएनसीन 7.9 कील सायलोसायबीन मॅजीक मशरूम तशेंच मशरूम कळे जप्त केल्यात. जप्त केल्ल्या ड्रग्जाची आंतरराष्ट्रीय बाजारांत 1 कोटी 69 लाख 47 हजार रुपया मोल आसा.
ह्या प्रकरणांत एएनसीचे उपनिरिक्षक मंजुनाथ नायक हांणी दुबावीत एवजिनी मोर्कोवीन हाचे आड 20 (बी)(ii)(ए) आनी 22 (सी) खाला गुन्यांव दाखल करून अटक केल्या. उपरांत ताका पेडणें पयलो वर्ग न्यायालयांत हजर केलो तेन्ना, न्यायालयान 9 दीस पुलीस कोठडेंत दवरपाचो आदेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
