भांगरभूंय | प्रतिनिधी
7 प्रभागांनी मतदान; आयज मतमेजणी; 4 बाबूश समर्थक बिनविरोध
पणजी: ताळगांव पंचायतीच्या सात प्रभागां खातीर आयतारा 68.79 टक्के मतदान जालें. इकरा प्रभागां मदल्या चार प्रभागांनी हाचे पयलींच उमेदवारांची बिनविरोध निवड जाल्ली. ताका लागून सात प्रभागां खातीर मतदान जातलें आनी आयज (सोमारा) मतमेजणी जातली.
प्रभाग एक, स, धा आनी इकरा मदल्या उमेदवारांची हाचे पयलींच बिनविरोध निवड जाल्या. उरिल्ल्या सात प्रभागांत वट्ट 14 उमेदवार रिंगणांत आशिल्ले. ह्या वेळार ताळगांव पंचायतीचे वेंचणुकेंत मंत्री तशेंच पणजीचे आमदार बाबूश मोंसेरात हांच्या पॅनला आड इंडी आघाडीच्या घटक पक्षांनी एकठांय येवन उमेदवार दिल्ले. ताका लागून पंचायत वेंचणूक अटीतटीची जातली असो अदमास आशिल्लो.
पूण बाबूश पॅनलाचे प्रभाग एकांतले उमेदवार सिद्धी केरकार, प्रभाग सतले उमेदवार एस्टेला डिसोझा, प्रभाग धातले उमेदवार सागर बांदेकार आनी इकरांतले उमेदवार सिडनी पॉल बार्रेटो ह्या चार उमेदवारांची बिनविरोध निवड जाल्ल्यान पंचायतीचेर परतून बाबूश गटाचीच सत्ता स्थापन जावपाची शक्यताय आसा. मंत्री बाबूश मोंसेरात, आमदार जेनिफर मोंसेरात हांणीय मतदानाचो अधिकार बजायलो.
खंयच्या प्रभागांत कितलें टक्के मतदान
प्रभाग 2 : 70.98
प्रभाग 3 : 56.85
प्रभाग 4 : 69.68
प्रभाग 5 : 76.14
प्रभाग 7 : 80.16
प्रभाग 8 : 62.10
प्रभाग 9 : 69.37
वट्ट : 68.79
बाबूश-सिसील हांचे मदीं बाचाबाची
ताळगांव पंचायत वेंचणूक पारदर्शक पद्दतीन जावची हे खातीर आपूण यत्न करतलों अशें म्हणपी मंत्री बाबूश मोंसेरात हांचे समर्थक मतदान केंद्राचेर वचून मतदारांक हांयसां दाखयत आसात. मतदान प्रक्रियेंत आडखळी हाडपाचो यत्न करीत आसात असो आरोप आपाच्यो फुडारी सिसील रॉड्रिग्स हांणी केलो. हाचे वेल्यान सिसील हांणी मंत्री मोंसेरात हांचे मदीं बाचाबाची जाली. त्या वेळार दुबाव आसल्यार मामलेदारां कडेन कागाळ करात. ते योग्य ती कारवाय करतले अशेंय मोंसेरात हांणी सिसील हांकां सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
