भांगरभूंय | प्रतिनिधी
मोदी हांचे सभेक लागून कार्यकर्त्यां मदीं उमेद: तानावडे
पणजी: लोकसभा वेंचणुकेंतल्या भाजप उमेदवाराच्या प्रचारा खातीर केंद्रीय गृह मंत्री अमीत शाह 3 मे दिसा गोंयांत येवपाचे आसात आनी तांची जाहीर सभा म्हापश्यां जातली अशी म्हायती भाजपाचे प्रदेशाध्यक्ष सदानंद शेट तानावडे हांणी आयतारा पत्रकारां कडेन उलयतना दिली.
लोकसभा वेंचणुके खातीर गोंयांत 7 मे दिसा मतदान जातलें. मतदाना खातीर फक्त णव दीस उरल्यात. ताका लागून भाजपाच्या केंद्रीय मंत्र्यांनी गोंयांत येवन प्रचार करपाक सुरवात केल्या. प्रधानमंत्री नरेंद्र मोदी हांणी शेनवारा दक्षीण गोंयांत सांकवाळे जाहीर सभा घेवन दोनूय उमेदवारांचो प्रचार केलो.
मजगतीं, भाजपाच्या केंद्रीय फुडाऱ्यांनी गोंयांतल्या प्रचारा खातीर 40 स्टार प्रचारकांची वळेरी जाहीर केल्या. तातूंतल्या थळाव्या स्टार प्रचारकांनी राज्यांतल्या विवीध वाठारांनी सभा घेवपाक सुरवात केल्या. फुडल्या काळांत केंद्रीय पांवड्या वेले खूबशे फुडारी गोंयांत सभा घेवन दोनूय उमेदवारांचो प्रचार करतले अशें तानावडे हांणी म्हणलें.
भाजप सरकारा कडल्यान सगल्यांक समान न्याय
केंद्रांतलें नरेंद्र मोदी हांचें सरकार आनी गोंयांतलें डॉ. प्रमोद सावंत हांच्या फुडारपणा खालच्या सरकारान केन्नाच भेदभाव केलो ना. केंद्र आनी राज्य सरकाराच्यो सगल्यो येवजण्यो सगल्यां मेरेन पावयल्यात. फुडल्या काळांतूय भाजप सरकार अशेच पद्दतीन काम करतलें अशें तानावडे हांणी म्हणलें. काँग्रेस सरकाराच्या काळांत गोंयचो जितलो विकास जावंक नाशिल्लो, तितलो विकास भाजप सरकारान करून दाखयला. केंद्र सरकारान फाटल्या धा वर्सांच्या काळांत गोंयच्या विकासा खातीर हजारांनी कोटींचो निधी दिल्ल्याचेंय तांणी नमूद केलें.
प्रधानमंत्री नरेंद्र मोदी हांचे सभेक राज्यांतल्या सुमार 50 हजार लोकांनी हाजेरी लायली. ते खातीर सदानंद तानावडे हांणी गोंयच्या लोकांचे उपकार मानले. मोदी हांचे सभेक लागून भाजपाचे थळावे फुडारी, पदाधिकारी आनी कार्यकर्त्यां मदीं उमेद वाडल्या. मोदी हांणी गोंयकारांक दिल्लीं वचनां फुडल्या काळांत ते निश्चीतपणान पुराय करतले आनी गोंयचे दोनूय भाजपाचे उमेदवार वेंचून येतले असो ठाम विस्वासूय तांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.