भांगरभूंय | प्रतिनिधी
आसगांव पंचायत मंडळः फक्त रॅस्टोरंण्टाक मंजुरी
भांगरभूंय । प्रतिनिधी
म्हापशें: आसगांव पंचायत वाठारांत कसलेच तरेच्या डान्सबार वा नायट क्लबाक परवानगी दिवंक ना. कोणाक दुबाव आसल्यार म्हायती हक्काच्या माध्यमांतल्यान खात्री करून घेवची, अशें आसगांव पंचायत मंडळान पत्रकार परिशद घेवन सांगलें. पंचायत कार्यालयांत घेतिल्ले पत्रकार परिशदेत सरपंच हनुमंत नायक, सोनिया नायक, राघोबा कांबळे, व्यंकटेश गोवेकार, वर्ल्डर ब्रिटो, अश्विनी पोखरे आनी तनया गांवकार हाजीर आशिल्ली.
सरपंच नायक हांणी सांगलें, गांवांत नायट क्लबाक परवानगी दिल्या असो दावो कांय लोक करतात. हे संबंदांत विवीध वाठारांनी बसका घेवन अपप्रचार चालू आसा. पोरूं मे म्हयन्यांत मुणांगवाड्यार बार आनी रॅस्टोरंण्ट बांदकामा खातीर परवानगी दिवपाची मागणी वेवसायिकांनी केल्ली. ते प्रमाण पंचायत मंडळान फक्त बार आनी रॅस्टोरंण्ट बांदकामाकूच परवानगी दिल्ली.
ह्या बांदकामाक फक्त 31 मार्च 2024 मेरेनूच परवानगी दिल्ली. हे मजगतीं पंचायतीन दिल्ली परवानगी फाटी घेवची, अशी लेखी विनंती त्या बार आनी रॅस्टोरंण्ट धनयानूच केल्ली. ताका लागून पंचायती वतीन फुडली कसलीच कार्यवाही जावंक ना. हे विशींचीं सगळीं कागदपत्रां कार्यालयांत उपलब्ध आसात. कोणाक हाची स्वता खात्री करून घेवपाची आसा जाल्यार म्हायती हक्क कायद्या खाला अर्ज करून ती करून घेवची, अशें सरपंच नायक हांणी सांगलें.
स्वताच्या मालकीच्या बार आनी रॅस्टोरंण्ट बांदकामाक दिल्ली परवानगी रद्द करपा खातीर पंचायती कडेन मागणी करप अजापाचेंच आसा. भाटकारांनी आपल्यो जमनी बिगर गोंयकारांक विकच्यो न्हय, अशें पंच व्यंकटेश गोवेकार हांणी मागलें. गांवांत विवीध समाजीक विशय घेवन जागृती करपी समाज वावुरप्यांनी भाटकारांची भेट घेवची. गांवांतल्यो जमनी विकपा पसून तांकां आडावचे. अशें घडलें जाल्यार गांवांत कसलेच बेकायदो वेवसाय येवचे नात, असो दावो पंच राघोबा कांबळे हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
