भांगरभूंय | प्रतिनिधी
एल्टन डिकॉस्टाः भाजपा कार्यकर्त्यांनी धडो घेवचो
भांगरभूंय । प्रतिनिधी
फोंडें: कर्नाटकांत काँग्रेस सरकार सत्तेर येताच फक्त 3 म्हयन्यां भितर लोकांक दिल्लीं सगळीं आस्वासनां पुराय केल्यांत. पूण भाजप सरकारान 2014 त खण घोटाळ्याचें कारण दिवन सत्ता मेळयले उपरांत लोकांक दिल्लीं आस्वासनां वाऱ्यार हुबलीं. ते खातीर येता ते लोकसभा वेंचणुकेंत भाजपाक तांची सुवात दाखोवचे खातीर लोकांनी तयार रावचें, अशें आमदार एल्टन डिकॉस्टा हांणी सांगलें. मडकय मतदारसंघांत आयोजीत केल्ले कोनसो बसकेंत ते उलयताले.
ह्या वेळार इंडिया आघाडीचे उमेदवार कॅ. विरियातो फर्नांडीस, आपचे अॅड. सुरेल तिळवे, मनिषा उसगांवकार आनी हेर मानेस्त हाजीर आशिल्ले.
श्रीपाद नायक हांणी केंद्रांत मंत्री आसून लेगीत गोंयचे उदरगती कडेन फाट केली. दक्षीण गोंयांत भाजपाचे खूब कार्यकर्ते आसून लेगीत तांणी पल्लवी धेंपो हांकां उमेदवारी जाहीर केली. ताका लागून कार्यकर्त्यांनी धडो घेवपाची गरज आसा, अशें आमदार एल्टन डिकॉस्टा हांणी सांगलें.
मनिषा उसगांवकार हांणी सांगलें, फोंडें म्हालाक 4 मंत्री मेळ्ळ्यात. तरी लेगीत लोकांक गरजेची आशिल्ली सुविधा दिवपाक ते साप्प अपेशी थारल्यात. उपजिल्हो हॉस्पिटलांत गरजेची सुविधा नाशिल्ल्यान दरेका दुयेंतीक अदीक उपचारा खातीर गोमॅकाँत व्हरचो पडटा. ताचे वयल्यान म्हालांतल्या लोकांनी गांबिर्यान विचार करून लोकसभा वेंचणुकेंत मतदान करपाची गरज आसा.
मडकय मतदारसंघ अजून लेगीत मुळाव्या सुविधा पासून पयस आसा. मतदारसंघांत येवपी पर्यटकांक अजून गरजेच्यो सुविधा दिवपाक सरकार अपेशी थारलां. ताका लागून लोकसभा वेंचणुकेंत हे खेपे बऱ्या उमेदवाराक वेंचून दिवचे खातीर दरेकल्यान यत्न करपाक जाय, अशें अॅड. सुरेल तिळवे हांणी सांगलें. लोकसभा वेंचणुकेंत जिखून आयले उपरांत फोंडेंच्या उपजिल्हो हॉस्पिटलांत सिटी स्कॅन तशेंच अॅम्ब्युलन्स खासदार निधींतल्यान उपलब्ध करून दिवपाक प्राधान्य दितलों, अशें उमेदवार कॅ. विरियातो फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
