भांगरभूंय | प्रतिनिधी
मुख्यमंत्रीः कोणाचेंच घर मोडपाक दिवचो ना, कायदो हाडपाचें उतर
भांगरभूंय । प्रतिनिधी
म्हापशें: हळदोणें मतदारसंघांत आमचें सरकार विवीध उदरगतीचीं कामां करता. सगळ्यांचे उदरगती खातीर आमी बांदील आसात. हळदोणेंच्या लोकां फाटल्यान आपूण घट उबो रावतलों. कोणाचेंच घर मोडपाक दिवचों ना, ते खातीर गरजेचो कायदो हाडटले, अशें आस्वासन मुख्यमंत्री डॉ. प्रमोद सावंत हांणी हळदोणकारांक दिलें.
लोकसभा वेंचणुके निमतान हळदोणें आनी बस्तोड्यां आयोजीत कोनसो बसकेंत मुख्यमंत्री कार्यकर्त्यांक मार्गदर्शन करतना उलयताले. ह्या वेळार पक्षाचे उमेदवार श्रीपाद नायक, आदले आमदार ग्लेन टिकलो, जिल्हो पंचायत वांगडी मनिषा नायक, उत्तर गोंय मंडळ उपाध्यक्ष फ्रँकी कार्व्हालो, हळदोणेंचे सरपंच, उपसरपंच आनी पदाधिकारी हाजीर आशिल्ले.
आमचें सरकार प्रधानमंत्री आवास येवजण, अटल आशा येवजणेंतल्यान घरां बांदता. जाल्यार काँग्रेस पक्ष विभाजनाचें राजकारण करता. आमकां विरोधकांच्या सल्ल्यांची गरज ना. काँग्रेस पक्षाचें शटर बंद आसा आनी आयकर भरूंक ना, हे खातीर खातीं जप्त केल्यांत. तांकांच सध्या सल्ल्याची गरज आसा, अशी टिका मुख्यमंत्री डॉ. सावंत हांणी केली.
आमकां हळदोण्यां कोणाचीच गरज ना, कारण आमचे कडेन ग्लेन टिकलो आसा. फाटल्या 10 वर्सांत परिस्थिती बरी आशिल्ली, पूण फाटल्या दोन वर्सां सावन धर्म, कोमुनिदाद आनी पंचायतीच्या आदारान विवीध प्रस्न निर्माण करतात. ह्या सगळ्या प्रस्नांचेर उपाय म्हणल्यार कमळाक मतदान करून जैत मेळोवन दियात, असो उलो मुख्यमंत्री डॉ. सावंत हांणी मारलो. ह्या वेळार भाजपाचे उमेदवार श्रीपाद नायक आनी आदले आमदार ग्लेन टिकलो हांणी नरेंद्र मोदी हांकां परतून प्रधानमंत्री करचे खातीर मतदारांनी व्हड संख्येन भायर सरचें आनी कमळाक मतदान करचें, असो उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
