स्पोर्टींगाची निसट्टी हार

भांगरभूंय | प्रतिनिधी

दुसरी विभागीय आय लीगः आयज एफसी गोवा कडेन खेळटलो

भांगरभूंय । खबरां मेज

पणजीः स्पोर्टींग क्लब दी गोवान आपल्या दुसऱ्या विभागीय आय लीग मोहिमेची सांगता युनायटेड एससी आड जाल्ले मॅचींत 1-2 अशें हारीन केली.

वास्कोच्या टिळक मैदानाचेर शेनवारा ही मॅच खेळयिल्ली. अ‍ॅलिस्टर अँथनी हाणें 12 व्या मिण्टाक पेनल्टीचेर गोल मारून स्पोर्टींगाक आघाडेर व्हेलो, पूण युनायटेडान साहील हरिजन (44, 49 मिण्टां) हाच्या नेटार जैत मेळयलें. हे मॅची सयत स्पोर्टींगान आपले मोहिमेची सांगता 14 मॅचींतल्यान 19 गुणां सयत केली. आय लिगेंत प्रवेश मेळोवचे खातीर स्पोर्टींगाक फुडल्या मोसमांत दुसऱ्या विभागीय आय लीग वरवीं परतून यत्न करचे पडटले.

स्पोर्टींगाचो पंगड हे मॅची आदींच दुसरे सुवातेचे तशेंच आय लिगेंत प्रवेश करपाचे सर्तींतल्यान भायर पडिल्लो. तरी लेगीत फ्लेमिंगो ऑरेंजान खेळाक सकारात्मक आनी आक्रमक सुरवात केली. कांय वेळ थिरावले उपरांत डॉयल आल्वेस हाका युनायटेडाच्या खेळगड्यान प्रतिबंधीत वाठारांत उडयिल्ल्यान स्पोर्टींगाक पेनल्टी मेळ्ळी. 11 व्या मिण्टाक मेळिल्ले हे पेनल्टीचें स्ट्रायकर अ‍ॅलिस्टर अँथनी हांणी गोलांत रुपांतर केलें. अंदूंच्या मोसमांतलो हो ताचो 8 वो गोल थारलो. युनायटेडान ते उपरांत खर यत्न केले. साहील हरिजन हाणें तीन संदी निर्माण केल्यो. पयल्या दोन यत्नांत ताची शूट मातशी चुकली. तिसरे खेपे ताका हेडराचेर अपेस आयलें. पूण मध्यांतरा आदीं स्पोर्टींगाच्या डिफेन्सांतल्या उणावाचो फायदो साहिलान घेतलो. ताणें सोबीत यत्न करून गोलकिपर डायलन डिसोझाक फटयलो आनी पंगडाक बरोबरींत व्हेलो.

दुसऱ्या सत्राचे सुरवेक सोयऱ्यांनी आघाडी गेतली. उजवे वटेंतल्यान मेळिल्ल्या क्रॉसाचेर ताणे हेड घेवन गोल केलो. स्पोर्टींगान निमाण्या 25- 30 मिण्टांत बरोबरी खातीर केल्ले यत्न येसस्वी जाले नात. स्पोर्टींगाक आपलें लक्ष आतां गोवा प्रोफेशनल लिगे कडेन लावचें पडटलें. तांच्यो सर्तींतल्यो अजून दोन मॅची जावपाच्यो आसात. स्पोर्टींगाचो पंगड सध्या तिसरे सुवातेर आसा. सोमारा वास्कोच्या टिळक मैदानार तांची मॅच एफसी गोवा कडेन जातली. ते उपरांत बाणावलीच्या मैदानार पॅक्स ऑफ नागवा कडेन तांची म्हत्वाची मॅच जातली. ही मॅच जिखपी सर्तीचो जैतवंत थारू शकता.