भांगरभूंय | प्रतिनिधी
हरमला 1.69 कोटींचें ड्रग्स प्रकरण
म्हापशें: मदलोवाडो हरमला जप्त केल्ल्या सायलोसायबीन मॅजीक मशरूम ह्या ड्रग्साची घडणूक थळार फिल्ड टेस्टींग किटा वरवीं चांचणी केली ना. हो पदार्थ ड्रग्स आशिल्ल्याची पुश्टी जायनाशिल्ल्यान एएनसीन 1.69 कोटी रुपयांच्या ड्रग्स प्रकरणांत अटक केल्लो दुबावीत आरोपी एवजिनी मोर्कोवीन (33) ह्या रशियन नागरिकाची उत्तर गोंय अतिरिक्त जिल्हो न्यायालयान (पणजी) सशर्त जामिनार सुटका केली.
1 लाख रुपया हमी रक्कम आनी समान रकमेच्या हमिदाराच्या हमी प्रमाण हो जामीन अर्ज न्यायाधीश शेरीन पॉल हांणी मंजूर केलो. अर्जदारान आपलो कायम स्वरुपी पत्तो आनी मोबायल क्रमांक तशेंच जर तातूंत बदल केल्यार तो न्यायालया कडेन सादर करचो. हो पत्तो आनी मोबायल क्रमांकाची चवकशी अधिकाऱ्यांनी शहानिशा करची. न्यायालयाचे परवानगे बगर गोंया भायर वच्चें न्हय. साक्षिदारांक हांयसां वा धमकावपाचो यत्न करचो न्हय अश्यो अटी न्यायालयान लागून केल्यात.
एएनसीन ह्या ड्रग्साचो पदार्थ जादुई मशरूम (सायलोसायबीन मशरूम) आसा काय ना हें तपासपा खातीर घडणूक थळार फिल्ड टेस्टींग केल्ल्याचें सुचीत जायना. ह्या टप्प्यार न्यायवैजक प्रयोगशाळेचो कसलोच अहवाल ना आनी हे पदार्थ मॅजीक मसशरूम आशिल्ले आनी ते निशिद्ध पदार्थ आशिल्ले अशें निश्चीतपणान सांगूक येना. दुबाविता कडेन सांपडिल्ले पाचव्या रंगाच्या पानांचो पदार्थ हो फिल्ड टेस्टींग कीट चांचणेंत गांजो आशिल्ल्याचें दिसून आयलें.
ह्या गांज्याचें प्रमाण 2 कील आसून जे परिवर्तनीय प्रमाण आसा. ताका लागून घुंवळे वखदां कायद्याचें कलम 37 हांगा लागू जायना. ताका लागून अर्जदार जामिना खातीर पात्र आसा असो निश्कर्श न्यायालयान नोंद केलें.
तशेंच न्यायवैजक विज्ञान प्रयोगशाळे कडल्यान दुबाविता कडल्यान जप्त केल्लो (गांजो व्यतिरिक्त) मॅजीक मशरूम हो प्रतिबंधीत पदार्थ वेवसायीक प्रमाणांत आसा, हाची पुश्टी करपी अहवाल प्राप्त जाल्यार हो मंजूर केल्लो जामीन रद्द करपा खातीर न्यायालयांत वचपाचें स्वातंत्र सरकारी पक्षाक न्यायालयान दिलां.
सरकारी पक्षा वतीन सरकारी वकील अॅड. सामंत जाल्यार दुबाविताचे वतीन अॅड. कमलाकांत पोवळेकार हांणी न्यायालयांत युक्तिवाद केलो.
फाटल्या 27 मार्च 2024 दिसा सांजवेळा गोंय पुलिसांच्या घुंवळे वखदां विरोधी पंगडान (एएनसी) मदलोवाडो, हरमला दुबावीत आरोपीच्या भाड्याचे कुडीचेर धाड घाल्ली. ह्या वेळार दुबावीत एवजिनी मोर्कोवीन हाचे कुडींतल्यान 218 ग्राम वजनाचे सायलोसायबीन (मॅजीक मशरूम), 2 कील वजनाचो गांजो तशेंच बाटलेंत लागवड केल्लो 7.9 कील वजनाची सायलोसायबीन (मॅजीक मशरूम) आनी 150 नग मॅजीक मशरूम कळे हो ड्रग्स जप्त केल्लो. ह्या ड्रग्साचें आंतरराष्ट्रीय बाजारांत 1 कोटी 69 लाख 47 हजार रुपया मोल जाता. पुलिसांनी दुबावीत एवजिनी मोर्कोवीन हाचे आड 20(बी)(2)(ए) आनी 22(सी) खाला गुन्यांव दाखल करून ताका अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
