भांगरभूंय | प्रतिनिधी
भाजपाचें काँग्रेस प्रदेशाध्यक्ष अमीत पाटकार हांकां आवाहन
पणजी: कर्नाटकांत काँग्रेसीचें सरकार आसा. ताका लागून म्हादय न्हंये वेल्यान भाजपाचेर टिका करपी काँग्रेस प्रदेशाध्यक्ष अमीत पाटकार हांणी कर्नाटकांतल्या काँग्रेस सरकाराक सविस्तर प्रकल्प अहवाल (डीपीआर) रद्द करपाक भाग पाडचें अशें आवाहन प्रदेश भाजपाचे म्हणयारे गिरीराज पै वेर्णेंकार हांणी दिलें.
पणजेंतले भाजप कचेरेंत आयतारा घेतिल्ले पत्रकार परिशदेंत ते उलयताले. ह्या वेळार तांचे सयत समाज कल्याण मंत्री सुभाष फळदेसाय आनी भाजप महिला मोर्चाच्यो अध्यक्ष आरती बांदोडकार हाजीर आशिल्ल्यो.
म्हादयच्या रक्षणा खातीर केंद्र आनी राज्य सरकार कटिबद्ध आसा. म्हादय विशीं केंद्र सरकार गोंयचेर कसलोच अन्याय करचें ना. ते खातीर केंद्रान ‘प्रवाह’ची स्थापणूकय केल्या. पूण काँग्रेस प्रदेशाध्यक्ष अमीत पाटकार होच विशय परतून परतून काडून गोंयच्या लोकांची दिशाभूल करूंक पळयतात. कर्नाटकांत काँग्रेसीचें सरकार आशिल्ल्यान पाटकार हांणी तांचे कडल्यान ‘डीपीआर’ रद्द करून घेवचो अशें वर्णेंकार हांणी म्हणलें.
मजगतीं, प्रधानमंत्री नरेंद्र मोदी हांचे सांकवाळे जाल्ले सभेक 50 हजारां परस चड गोंयकारांनी हाजेरी लायली. ही हाजेरी पळोवन पाटकार थतर वितर जाल्यात. ताका लागून ते सेगीत बिनबुडाचे आरोप करीत आसात. गोंयचे लोक ह्या वेळारूय भाजपा बरोबर आसात. ताका लागून लोकसभा वेंचणुकेंत भाजपाचे दोनूय उमेदवार निश्चीतपणान जिखतले असोय विस्वास तांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
