भांगरभूंय | प्रतिनिधी
शिवोलेच्या डॉम्नीक डिसोझाक सोडचें पडटलें उत्तर गोंय
भांगरभूंय | प्रतिनिधी
म्हापशें: शिवोलेच्या फायव्ह पिलर इगर्जेचो धर्मगुरू आनी स्वताक ‘गॉड मॅन’ म्हणपी डॉम्नीक डिसोझा आनी ताचे घरकान्नीक उत्तर गोंयांतल्यान हद्दपार करपाचो आदेश उत्तर गोंय जिल्लो जिल्होधिकाऱ्यान जारी केले उपरांत ताका डॉम्नीकान सचीव संबंदीत यंत्रणां कडेन अर्जा वरवीं आव्हान दिल्लें. ताचो हो अर्ज न्हयकारिल्ल्यान दोगांकूय उत्तर गोंय सोडचें पडटलें.
डॉम्नीका आड 2009 वर्सा सावन 9 कागाळींचेर आदारून गुन्यांव नोंद आसात. तातूंतले तीन गुन्यांव धर्मांतरा कडेन संबंदीत आसात. मूळ तमिळनाडूचो आनी सध्या कुर्टी- फोंड्यां रावपी एका नागरिकान डॉम्नीका आड धर्मांतर करपाचो यत्न आनी फटवणुकेची कागाळ दाखल केल्ली.
सडये- शिवोलीच्या बिलिव्हर्सच्या फायव्ह पिलर इगर्जेंतल्यान डॉम्नीक ब्लॅक मॅजीक करून धर्मांतर करता अशी कागाळ मूळ तामिळनाडूचो वडिवेल बी. हांणी म्हापशें पुलिशेंत केल्या. हे कागाळी प्रमाण पुलिसांनी डॉम्निकाक अटक करून अंदूं जानेवारींत न्यायालयांत हजर केल्लो. उपरांत ताका सशर्त जामीन मेळ्ळो.
डॉम्नीक हाणें फोंडेंच्या एका मनशाक धर्मांतर करपाची धमकी दिली, तशेंच धर्म मान्य करपाचें हांयस दाखयले असोय आरोप कागाळींत केला. ब्लॅक मॅजीक कायद्याच्या कलमा खाला गुन्यांव नोंद केल्लो.
फाटल्या दोन वर्सांत डॉम्नीका आड धर्मांतराच्यो कागाळी दाखल जाल्यात आनी ह्याच कलमा खाला ताचे आड नोंद जाल्लो हो तिसरो गुन्यांव. वेगवेगळ्या कलमां खाला आनीक 5 गुन्यांव नोंद जाल्यात. आतां मेरेन ताचे आड वट्ट 9 गुन्यांव नोंद आसात. हातूंत म्हापशें पुलीस स्टेशनांत 7 आनी गुन्यांव फांट्यांत 2 गुन्यांव नोंद जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
