भांगरभूंय | प्रतिनिधी
काँग्रेसी कडल्यान वेंचणुक आयोगा कडेन कागाळी
पणजी : लोकसभा वेंचणुकेच्या तिसऱ्या पावंड्यार आयज गोंयच्या उत्तर आनी दक्षीण ह्या दोनूय मतदारसंघांनी सकाळीं 7 वरांचेर मतदान सुरू जालें. सांजे 3 वरा मेरेन उत्तर गोंयांत 61.28 टक्के जाल्यार दक्षीण गोंयांत 61.50 टक्के मतदान जालां. पुराय राज्यात 61.50 टक्के मतदान जालें.
मतदान शांतीकायेन सुरू आसले तरी उमेदवार, मंत्र्या कडल्यान वेंचणुक आचार संहिता मोडिल्ल्याच्यो (उल्लंघन) कागाळी काँग्रेसीन वेंचणुक आयोगा कडेन केल्या. उत्तर गोंय भाजप उमेदवार श्रीपाद नायक आनी दक्षीण गोंय भाजप उमेदवार पल्लवी धेंपो हांचे आड काँग्रेसीन आचारसंहीता मोडिल्ल्याच्यो कागाळी केल्या. श्रीपाद नायक हांणी मतदाना दिसा समाज माध्यमा वरवीं भाजपाक मत मारपाचें आवाहन केलें. पल्लवी धेंपो हांणी मतदान केंद्रा भायर माध्यमां कडेन उलयतना भाजपाक मत मारपाचे जाहीर आवाहन केले. दोगांनी वेंचणुक आचार संहिता मोडल्या, अशी कागाळ काँग्रेसीन केल्या. तशेच काँग्रेसीन मंत्री सुदिन ढवळीकार, आमदार राजेश फळदेसाय हांचे आड आचार संहिता मोडिल्ल्याच्यो कागाळी वेंचणुक आयोगा कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
