भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज सनरायझर्स हैदराबाद आनी लखनौ सुपर जायण्ट्स ह्या पंगडां मदीं मॅच जातली. दोनूय पंगडां खातीर ही मॅच म्हत्वाची आसा. हे मॅची वरवीं दोनूय पंगडांतल्या एकल्याचो प्ले ऑफांत पावपाचो मार्ग कांय प्रमाणांत मेकळो जातलो.
अंदूंच्या हंगामांत 16 ते 20 ओव्हरी मदीं सगल्यां परस लखनौ पंगडान सगल्यांत उण्यो धांवड्यो केल्यात. ह्या ओव्हरींनी 10.12 धांवड्यो प्रती ओव्हरीनी केल्यात. हाचें एक म्हत्वाचें कारण म्हणल्यार ताचें घरगुती मैदान एकाना आसा. ह्या मैदानाचेर 18.1 बॉलांनी एक सको येता. अंदूंच्या हंगामांत सगल्यांत उणो आसा. दुसरी गजाल म्हणल्यार निकोलस पुरनाचेर मॅच सोंपोवपाची जापसालदारकी गरजे परस चड आसा. लखनौ खातीर 16 ते 20 ओव्हरी मेरेन 22तले 15 सके ताणें एकल्यान मारल्यात. पुरन जे स्थितींत बॅटींग येता ते स्थितींत मार्कस स्टॉयनीसाची स्ट्रायक रेट आनीक चड बरी आसा. पूण, अंदूंच्या हंगामांत ताणें तिसरे वा चवथे सुवातेर चड बॅटींग केल्या. हाचो अर्थ तो फकत तीन खेपे अखेर मेरेन खेळपट्टीचेर आशिल्लो. पोरूं तो पांचवे सुवातेर खेळटालो आनी डॅथ ओव्हरींनी 207चे स्ट्रायक रेटीन 120 धांवड्यो केल्ल्यो. हातूंत 12 सक्यांचो लेगीत आस्पाव आशिल्लो.
हैदराबादाचो फास्ट बॉलर टी नटराजनान उत्कृश्ट प्रदर्शन केलां. अंदूंच्या हंगामांत नटराजनान दरेक 14 बॉलांनी एक विकेट घेतल्या. ताणें अंदूं अजून मेरेन णव मॅचींनी खेळटना 15 विकेटी घेतल्यात. फाटल्या हंगामा कडेन तुळा केली जाल्यार अंदूंचें ताचें प्रदर्शन जबरदस्त आसा. अंदूंच्या हंगामांत ताचे परस फकत हर्षल पटेलाचें उत्कृश्ट प्रदर्शन आसा.
सनरायझर्स हैदराबादा विशीं सांगचें जालें जाल्यार ताचे बॅट्समन थंयच्याय खिणाक सके मारतात. मदल्या ओव्हरींनी ताणें प्रती मॅचींत पांच सके मारल्यात. डॅथ ओव्हरींनी ताणें अजून मेरेन 41 सके मारल्यात. लखनौ परस (22) दोन पटीन चड आसात.
अंदूंच्या हंगामांत 200 बॉल घालपी लेग स्पिनर रवी बिश्नोई एका परस चड विकेटी घेवपाक खूब संघर्श केला. बिश्नोईक फकत एकेच मॅचींत दोन विकेटी घेवप शक्य जालां. हेर 10 मॅचींनी ताणें पांच खेपे एक विकेट घेतल्या आनी पांच मॅचींनी एकूय विकट मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
