दिवचल म्हालांत शांततायेन मतदान

भांगरभूंय | प्रतिनिधी

तिनूय मतदारसंघांनी उत्साही वातावरण

दिवचल: दिवचल म्हालांत मयें, दिवचल आनी सांखळी ह्या तिनूय मतदारसंघांत सकाळ सावन उत्साही वातावरणांत तशेंच पर्यावरण पुरक आनी विविधतायेन नटिल्ल्या मतदान केंद्रांत मतदाना खातीर उत्साह दिसून आयलो.

पयल्या टप्प्यांत 17 ते 13 टक्के. दनपारां एक मेरेन 61 ते 50 टक्के. दनपारां तीन वरांचेर सांखळे 72 टक्के जाल्यार मयें आनी दिवचले सुमार 65 टक्के मतदान जाल्लें.

विकसीत भारताचे सपन साकारपा खातीर तशेंच स्वयंपूर्ण गोंय, आत्मनिर्भर गोंय खाला फुडलीं पांच वर्सां नवे उमेदीन प्रधानमंत्री नरेंद्र मोदी हांच्या फुडारपणा खाला परतून एकदां डबल इंजीन विकासा खातीर सज्ज जातलें. ते खातीर व्हड प्रमाणांत मतदान जाल्ल्यान राज्यांतल्या दोनूय सुवातांचेर भाजप उमेदवारांचे जैत निश्चीत आशिल्ल्याची खात्री मुख्यमंत्री डॉ. प्रमोद सावंत हांणी उक्तायली.

कोठंबी पाळी हांगासरल्या बूथ नंबर 47 चेर प्रमोद सावंत आनी सुलक्षणा सावंत हांचे सयत तांचे बापूय पांडुरंग सावंत बी हांणी मतदान केलें. ह्या वेळार उलयतना वेंचणूक आयोगान विवीध सुवातांनी पर्यावरण पुरक आनी नाविन्यपूर्ण अशीं मतदान केंद्रां उबारतना एके तरेन मतदारांक स्फूर्त, उत्साह येवचो अशे तरेचें वातावरण निर्माण केलें. ताका लागून निश्चीतपणान बऱ्या वातावरणांत वेंचणूक प्रक्रिया ह्या वाठारांत संपन्न जाल्ल्याचें डॉ. प्रमोद सावंत हांणी म्हणलें.

काल सकाळीं दिवचलचे आमदार डॉ. चंद्रकांत शेट्ये हांणी मेणकुऱ्यां मतदान केलें. जाल्यार कुमारवाड्या वेल्या बुथार मयेंचे आमदार प्रमेंद्र शेट हांणी मतदान केलें.

कारापूर मतदान केंद्राचेरय आदले मुख्यमंत्री प्रतापसिंह राणे, भलायकी मंत्री विश्वजीत राणे, पर्येंची आमदार दिव्या राणे हांणी मतदान केलें.

सकाळीं सात वरां सावन मतदान प्रक्रियेक सुरवात जाली. एखाद दोन कडेन मशीन आनी हेर बाबतींत थोडोसो कळाव सोडलो जाल्यार वट्ट प्रक्रिया पुरायपणान शांततायेन आनी सहजगतीन जाली. सकाळच्या सत्रांत कांय बुथांचेर बरीच गर्दी दिसून आयली. पूण शांत पद्दतीन मतदारांनी आपआपलीं मतां नोंदोवन लोकशायेच्या उत्सवांत बरो प्रतिसाद दिलो.

नव्या मतदारांनी उत्स्फूर्तपणान मतदान करतना नवभारत निर्मितीचो ध्यास घेवन प्रधानमंत्री नरेंद्र मोदी हे अखंडीत सेवा करीत आसून परतून एकदां ते प्रधानमंत्री जावचे हो आमचो संकल्प आसा, आनी तरणाटी शक्ती फाटल्यान प्रधानमंत्री खंभीरपणान उबे आसात. तेचबरोबर मुख्यमंत्री डॉ. प्रमोद सावंत हांणी लेगीत तरणाट्यां खातीर स्वयंपूर्ण आनी आत्मनिर्भर येवजण्यांक चालना दिल्ल्यान तांच्याय सपनांची पुर्तताय करपा खातीर तरणाटी शक्ती निश्चीतपणान कार्यरत रावतली अशा प्रकारच्यो प्रतिक्रिया नव्या मतदारांनी उक्तायल्यो.

बायलां, दादले, ज्येश्ठ नागरीक आनी सर्वसामान्य लोकांनी मतदान प्रक्रियेंत आपली भुमिका बजायली. मतदान केंद्राचेर दिव्यांग ज्येश्ठ आनी हेर मतदारां खातीर सगले तरेची सुविधा उपलब्ध केल्ली. उपनिर्वाचन अधिकारी रमेश गांवकार, विमोद दलाल तशेंच सचीन देसाय ह्या अधिकाऱ्यांनी तशेंच पुलीस, येरादारी आनी हेर अधिकाऱ्यांनी आपआपले परीन बरी वेवस्था केल्ली. ताका लागून एकूणच वेंचणूक प्रक्रिया शांततायेन जाली.