दिल्ली कॅपिटल्साची आस्त कायम

भांगरभूंय | प्रतिनिधी

इंडीयन प्रिमीयर लिगेचे (आयपीएल) 56वे मॅचींत येजमान दिल्ली कॅपिटल्सान राजस्थान रॉयल्साक 20 धांवड्यांनी हारयलो. दिल्ली कॅपिटल्सान दिल्ले 222 मोखीचो फाटलाव करपी राजस्थानाक 20 ओव्हरींनी 8 विकेटी व्हगडावन 201 धांवड्यो करप शक्य जाल्यो.

राजस्थान रॉयल्साचो मुखेली संजू सॅमसनान दिल्लीच्या बॉलरांची बॉलींग फोडून काडली. पूण, शाई होपान शिमे लागसार उत्कृश्ट कॅच धरून दिल्ली कॅपिटल्साक व्हड विकेट मेळोवन दिली. 16वे ओव्हरींत सॅमसन बाद जालो आनी कांय प्रमाणांत मॅच दिल्ली वटेन घुंवली. ते उपरांत 18वे ओव्हरींत कुलदीप यादवान 4 धांवड्यो दिवन 2 विकेटी घेवन मॅच पुर्णपणान दिल्ली वटेन घुंवडायली. ते उपरांत राजस्थानाक मॅचींत येवप कठीण जालें आनी दिल्लीन मॅच जिखून प्ले ऑफाचे रेसींतलें आव्हान कायम राखलें. दिल्लीचे 12 मॅचींतल्यान 12 गूण जाल्यात.

यशस्वी जयस्वाल (4) अपेशी थारल्या उपरांत संजू सॅमसन आनी जॉस बटलर हांणी राजस्थानाचो डाव सांबाळ्ळो. बटलराची विकेट घेवपा खातीर ऋषभ पंतान अक्षर पटेलाक हाडलो. बटलरान ताका चवके मारून लेगीत अक्षरान पांचव्या बॉलाचेर बटलराक (19) बोल्ड केलो. एके वटेच्यान सॅमसनान बाजू सांबाळून धरिल्ली. बटलरान बाद जावचे पयलीं सॅमसना वांगडा मेळून 33 बॉलांनी 63 धांवड्यांची भागिदारी केल्ली.

सॅमसनान रियान परागा (26) वांगडा मेळून 36 धांवड्यांची भागिदारी केली. पूण, वेग उणो जाल्लो. परागाची विकेट घेवपी रसिखाचे फुडले ओव्हरींत सॅमसनान दोन सके आनी एक चवको मारलो. ते उपरांत शुबम दुबे आनी इशांत शर्मा हांची लेगीत बॉलींग फोडून काडली.

सॅमसनान दिल्लीच्या बॉलरां वयलें चेपण वाडयिल्लें. 16वे ओव्हरींत शिमे लागसार शाई होपान सॅमसनाची उत्कृश्ट कॅच धरली. सॅमसन 46 बॉलांनी आठ चवके आनी स सक्यांचे मजतीन 86 धांवड्यो केल्यो. ते उपरांत शुभम दुबे 12 बॉलांनी 25 धांवड्यो करून बाद जालो. 18वे ओव्हरींत कुलदीपान चार धांवड्यो दिवन दोन विकेटी घेतल्यो.

राजस्थानाक 12 बॉलांनी 37 धांवड्यांची गरज आशिल्ली. रोव्हमन पॉवेल निमाणी आस्त आशिल्ली. पूण, मुकेश कुमाराच्या बॉलाचेर पॉवेल (13) बोल्ड जालो आनी राजस्थानाची आस्त सोंपली.

जॅक फ्रेझर मॅकगर्क आनी अभिषेक पोरेल हांच्या अर्द शेंकड्यां नेटार दिल्ली कॅपिटल्साक झणझणीत सुरवात करून दिली. अणभवी ऑफ स्पिनर आर आश्विनान राजस्थान रॉयल्साच्यो तीन विकेटी घेतल्यो. पूण, हेर बॉलरांक दिल्ली कॅपिटल्साच्या धांवड्यांचो वेग उणो करपाक जमलो ना. युजवेंद्र चहलान ऋषभ पंताक बाद करून आयपीएलांत 200 विकेटी पुर्ण करपी पयलो बॉलर जावपाचो मान मेळयलो.

गुलबदीन नैब आनी त्रिस्तान स्टब्स हांणी अखेरच्या ओव्हरींनी आकर्शक शॉर्ट मारून पंगडाक 200चो पांवडो हुपून दिलो.

आक्रमक ओपनर जॅक फ्रेझर-मॅकगर्कान फकत 19 बॉलांनी अर्द शेंकडो मारून राजस्थान रॉयल्साक घाम काडलो. आवेश खानाचे एके ओव्हरींत जॅकान चार चवके आनी दोन सके मारले.

अणभवी आर आश्विनान राजस्थानाक पयलें येस मेळोवन दिलें. ताणें खतरनाक धारिल्ल्या जॅकाक तंबूंत धाडलो. जॅकान 20 बॉलांनी 50 धांवड्यो केल्यो. हातूंत सात चवक्यांचो आनी तीन सक्यांचो आस्पाव आशिल्लो. शाई होप (1) धांवबाद जालो. अभिषेक पोरेलान मारिल्लो सरळ शॉर्ट बॉलर संदीप शर्मान आडावपाचो यत्न केलो. बॉल शर्माच्या हाताक लागून नॉन स्ट्रायक अॅण्डाच्या विकेटींक लागलो आनी क्रीज सोडून मुखार आशिल्लो शाई होप धांवबाद जालो.

दोन विकेटी पडल्या उपरांत लेगीत अभिषेकाची आक्रमक बॅटींग चालूच आशिल्ली. आश्विनान अक्षर पटेलाक (15) बाद केलो. अखेरेक आश्विनान लेगीत अभिषेकाक बाद केलो. अभिषेकान 36 बॉलांनी सात चवके आनी तीन सक्यांचे मजतीन 65 धांवड्यो केल्यो.

युजवेंद्र चहलाचे बॉलिंगेचेर स्विप शॉर्ट मारपाच्या यत्नांत ऋषभ पंत (15) बाद जालो. चहलची ही आयपीएलांतली 200वी आनी टी-20 क्रिकेटींतली 350वी विकेट थारली. असो पराक्रम करपी तो भारताचो पयलो बॉलर थारलो. राजस्थानान उत्कृश्ट बॉलींग करून धांवगतीचेर कांय प्रमाणांत अंकूश दवरलो. आश्विनान 24 धांवड्यो दिवन 3 विकेटी घेतल्यो. चहल परतून म्हारग थारलो. ताणें चार ओव्हरींनी 48 धांवड्यो दीत फकत एक विकेट घेतली. त्रिस्तान स्तब्सान चहलाचे चवथे ओव्हरींत 21 धांवड्यो केल्यो. 19वे ओव्हरींत बोल्टान गुलबदीनाक (19) बाद केलो. इम्पॅक्ट प्लेयर रसिख सलामान दोन चवके मारले.

20वे ओव्हरींत स्तब्सान दोन सके मारून संदीप शर्माक येवकार दिलो. पूण, तिसऱ्या बॉलाचेर तो एलबीडब्ल्यू बाद जालो. ताणें 20 बॉलांनी तीन चवके आनी तीन सक्यांचे मजतीन 41 धांवड्यो करून पंगड वेवस्थापनान दिल्ली जापसालदारकी येसस्वी रितीन सांबाळ्ळी. दिल्लीन 8 विकेटी व्हगडावन 221 धांवड्यो केल्यो.