भांगरभूंय | प्रतिनिधी
उत्तर गोंयांत काँग्रेसीचें जैत निश्चीत: रमाकांत खलप
हरमल: उत्तर गोंय लोकसभा वेंचणुकेंत काँग्रेसीच्या जैता खातीर कार्यकर्ते खूब कश्ट घेत आसात. तशेंच राज्यांतल्या कांय सद्याच्या आनी कांय आदल्या आमदारांचो लिपचोरयां तेंको आशिल्ल्यान आपलें जैत निश्चीत आशिल्ल्याचें काँग्रेसीचे उमेदवार रमाकांत खलप हांणी मांदऱ्यां उक्तायलें.
दांडोसवाडो मतदान केंद्रांत भेट दिवपा खातीर आयिल्ले उमेदवार खलप पत्रकारां कडेन उलयताले. भाजपाचे श्रीपाद नायक हांणी आपल्या 2014 वर्साचे वेंचणुकेंत जाल्ले हारी विशीं उलोवप केलें. ताका लागून लोकां मदीं चर्चा सुरू जाली आनी मतदारांनी हे खेपे बदल करपाचो निर्णय घेतिल्ल्याचें दिसता. पेडणें म्हालांतल्या दोनूय मतदारसंघांनी आपणाक आघाडी मेळटली.
मांदऱ्यां म्हजें हायस्कूल, कॉलेज तशेंच व्यक्तीगत पांवड्यार संबंद आशिल्ल्यान ताचो फायदो जातलो. उण्यांत उणी 15 ते 16 हजाराची आघाडी निश्चीतपणान मेळटली असो दावो खलप हांणी केलो.
वाळपय मतदारसंघांत आपले बरे पैकीं संबंद आसात आनी लोकसभा वेंचणुकेंत लोक आपल्या कार्याची दखल घेतले आनी खूबशा जाणां खातीर आपलें कार्य आनी काम केल्ल्यान ताचो फायदो आपणाक जातलो अशें रमाकांत खलप हांणी म्हणलें.
अंदूं पयलेच फावटी मतदार उत्स्फूर्तपणान मतदाना खातीर भायर सरल्यात. देशाच्या फुडारा खातीर मतदान करूंक जाय. फाटल्या 10 वर्सांत देशाचो विकास पळयत जाल्यार तांचे खातीर मतदान करप गरजेचें आसा अशें मांद्रेंचे आमदार जीत आरोलकार हांणी म्हणलें.
म्हजे विरोधक आसतले, पूण आपूण विरोध मानीना, एकठांयपणान काम करप गरजेचें आसा. काँग्रेस उमेदवाराचें हायस्कूल, कॉलेज तशेंच तीन फावटी आमदार, एकदां खासदार आशिल्ले. तांचे वैयक्तीक संबंद आशिल्ल्यान तांकां थोडीभोव मतां मेळटली पूण भाजपाचेर ताचो कसलोच परिणाम जावचो ना अशें आरोलकार हांणी म्हणलें.
मांद्रेंतल्या दरेक बुथार भाजपाक आघाडी मेळटली आनी म्हालांत बरे पैकीं आघाडी मेळटली अशें आरोलकार हांणी सांगलें. भाजपांत आशिल्ल्या आनी तेंको दिल्ल्या मनशांनी आपल्या समर्थकांक हेर उमेदवाराक मतदान करपाची गुप्त चाल केल्या, ते विशीं आपल्याक कांयच म्हायती ना. मात त्या मनशाची कांय राजकी समिकरणां आसतलीं. निमाण्या खिणाक मतदार बदलचो ना, भाजपाक पर्याय ना अशें आमदार जीत आरोलकार हांणी जाप दिली.
आदले जिल्हो पंचायत वांगडी दपक कळंगूटकार हांणी काँग्रेस पक्षा खातीर मतदान जायत आशिल्ल्याचें चित्र दिसून येता अशें म्हणलें.
हे वेंचणुके विशीं मतदार गोंदळांत आसून दोनूय पक्ष जैताचो दावो करीत आशिल्ल्याचें आदले जिल्हो पंचायत वांगडी श्रीधर मांजरेकार हांणी आपले मत उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
