भांगरभूंय | प्रतिनिधी
फोंडें: पार-उसगांवां दुचाकीची रस्त्यार पडिल्ले मरण आयिल्ले गायेक धपको बशिल्ल्यान मरुद्दीन अन्सारी (23, पणसुलें-धारबांदोडें) हो दुचाकी चालक गंभीर जखमी जालो. जखमीक अदीक उपचारा खातीर गोमॅकाँत दाखल केला. फोंडें पुलिसांनी अपघाताचो पंचनामो केलो.
मेळिल्ले म्हायती प्रमाण सोमारा रातीं 10.30 वरांच्या सुमाराक एक अनवळखी वाहनाचो धपको बसून गायेक मरण आयिल्लें. मरण आयिल्ली गाय राष्ट्रीय म्हामार्गार काळखांत पडून आशिल्ली. मरुद्दीन अन्सारी हो आपली जीए 12 बी 2221 क्रमांकाची दुचाकी घेवन सोमारा रातीं तिस्क उसगांव सावन फोंड्यां वतालो. पार – उसगांवां रस्त्यार काळोख आशिल्ल्यान मरण आयिल्ले गायेक दुचाकीचो धपको बसलो. हातूंत दुचाकी चालक गंभीर जखमी जालो. जखमीक सगल्यांत पयलीं पिळयां मुळाव्या भलायकी केंद्रांत दाखल केलो. उपरांत अदीक उपचारा खातीर ताका गोमॅकाँत दाखल केलो.
फोंडेंचे पुलीस निरिक्षक तुषार लोटलीकार हांच्या मार्गदर्शना खाला हवालदार देविदास पर्येंकार हांणी अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
