भांगरभूंय | प्रतिनिधी
सुमार अर्दवरान मतदानाक सुरवात; मतदान शांततायेन
फोंडें: लोकसभा वेंचणुकेंत फोंडें आनी धारबांदोडें म्हालांत सगल्या सुवातांनी शांततायेन मतदान जालें. शिरोडें 75.90, फोंडें 75.64, मडकय 75.73, प्रियोळ 75.50 आनी धारबांदोडें म्हालांतल्या सांवड्डें मतदादरसंघांत 75.29 टक्के मतदानाची नोंद जाली. शिरोड्यां ईव्हीएम मशीन बंद पडिल्ल्यान सुमार अर्दवरा उपरांत मतदानाक सुरवात जाली. जाल्यार फोंड्यां काँग्रेस फुडाऱ्यान भाजपाक तेंको दिल्ल्याचो संदेश व्हायरल केल्ल्या प्रकरणांत प्रितम हरमलकार हाचे आड कागाळ दाखल केली.
फोंडें आनी धारबांदोडें म्हालांत मंगळारा सकाळ सावन मतदान केंद्राचेर मतदारांच्यो रांगो दिसून आयल्यो. खूबशा मतदान केंद्रांचेर सुरळीत मतदान जालें. जाल्यार पाडलवाडो – बेतोडेंच्या मतदान केंद्राचेर सकाळ सावन गर्दी दिसून आयली. सगले कडेन खर पुलीस बंदोबस्त दवरिल्लो.
वाजें – शिरोड्यां 23 क्रमांक मतदान केंद्राचेर मंगळारा सकाळीं ईव्हीएम मशीन सुरू जावंक नाशिल्ल्यान मतदारांक सुमार अर्दवर रांगेत उबे रावपाची वेळ आयली. अधिकाऱ्यांनी ईव्हीएम मशिनाची दुरुस्ती करून सकाळीं 7.30 वरांचेर मतदानाक सुरवात केली. ताका लागून सकाळीं अर्दवर मतदान सुरू करपाक कळाव जालो. उपरांत मतदान केंद्राचेर मतदान सुरळीत जालें.
फोंड्यां काँग्रेस फुडारी म्हूण कार्यरत आशिल्ले युवा उद्देजक राजेश वेरेंकार हांणी भाजपाक तेंको दिल्ल्याचो फटीचो संदेश व्हायरल केल्ल्या प्रकरणांत प्रितम हरमलकार हाचे आड काँग्रेस कार्यकर्त्यांनी फोंडें पुलीस स्टेशनार कागाळ दाखल केल्या. फोंडें पुलीस ह्या प्रकरणाची चवकशी करीत आसून गुन्यांव नोंद जावपाची शक्यताय उक्तायतात.
बांदोड्यां मतदान केले उपरांत पत्रकारां कडेन उलयतना वीज मंत्री सुदिन ढवळीकार हांणी मगो आनी भाजपा हांचे युतीचो लाव भाजप उमेदवार पल्लवी धेंपो हांकां जातलो. मडकय मतदारसंघांतल्यान व्हड प्रमाणांत मतां दिवपाचो यत्न केल्ल्याचें तांणी सांगलें.
कृशी मंत्री रवी नायक हांणी भाजप उमेदवार पल्लवी धेंपो हांचें जैत निश्चीत आसा. फोंडें मतदारसंघांतल्यान भाजपाक व्हड आघाडी मेळटली अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
