भांगरभूंय | प्रतिनिधी
न्यायालयान संबंदीत यंत्रणांक धारेर धरून जारी केले निर्देश
भांगरभूंय । प्रतिनिधी
पणजीः पणजी स्मार्ट सिटी प्रकल्प संबंदांत नियोजन केल्ल्या सल्लागारांनी ताचे अंमलबजावणीचेर लक्ष दवरप अपेक्षीत आशिल्लें. अशें आसतना न्यायाधिशांचे पळोवणे वेळार ते सायटीर खंयच नाशिल्ले. ते भायर भौशीक निधींतल्यान कोट्यांनी रुपयांचो हो प्रकल्प कित्याक आडखळ्ळा, पणजेच्या लोकांक खूब त्रास सोंसचो पडलो, हाचो सोद घेवपाची गरज आसा, अशें निरिक्षक नोंद करून गोंयांतल्या मुंबय उच्च न्यायालयान संबंदीत यंत्रणांक धारेर धरून येरादारी वेवस्था, रस्तो सुरक्षा आनी धुल्ल प्रदुशण आडावपाचे निर्देश जारी केल्यात.
स्मार्ट सिटी प्रकल्पांक लागून जावपी गैरसोय आनी धुल्लाचें प्रदुशण उणें करचे खातीर सरकार आनी इमॅजीन पणजी स्मार्ट सिटी डॅव्हलपमेंट कॉर्पोरेशन लि. (आयपीएससीडीएल) हांकां ताकतिकेचें निर्देश दिवचे, अशी विनवणी करपी जनहीत याचिका पियुष पांचाल, ऑल्वीन डिसा आनी निलम नावेलकार ह्या तिगांनी उच्च न्यायालयांत दाखल केल्या. हाची दखल घेवन उच्च न्यायालयाचे न्यायाधीश महेश सोनक आनी न्या. वाल्मिकी मिनिझीस हांणी 1 एप्रील 2024 ह्या दिसा सांजे वेळार पळोवणी करून वयलें निरिक्षण नोंद केलें. तशेंच त्या वेळार न्यायाधिशांनी थळाव्या लोकां कडेन तशेंच अधिकाऱ्यां कडेन संवाद सादलो.
ह्या वेळार न्यायाधिसांनी वाठारांत धुल्ल प्रदुशणा संबंदांत उबारिल्ल्या यंत्रणांतल्या अहवालाची दखल घेतली. त्या वेळार वाठारांत धुल्लाच्या प्रदुशणाक लागून लोकांक त्रास जाता अशें मुखार आयिल्ल्यान तें आडावपाचे निर्देश जारी केले. तशेंच यंत्रणा एक दोन कडेन दवरिनासतना हेर वाठारांनीय दवरून प्रदुशणाचें मोजमाप करपाचे निर्देश जारी केले. वाठारांत रावपी ज्येश्ठ नागरिकांक तशेंच हेर लोकांक त्रास जावचे न्हय हाची जतनाय घेवपाचे निर्देश जारी केले. ते खातीर काम बेगीन पुराय करचे खातीर गरजेचीं पावलां उखलपाचीं सुचोवणी केल्या. भलायकी खात्याक निर्देश जारी करून वाठारांत म्हामारी तशेंच हेर भलायकी संबंदांत जतनाय घेवपाच्यो सुचोवण्यो केल्यात.
स्मार्ट सिटी प्रकल्पाचें काम करपी कामगारांची सुरक्ष संबंदांत उपाय येवजण चालीक लावपाचे निर्देश जारी केले. लोकांक जायरात वा सुचोवणी तकटो लावन कामाची म्हायती दिवपाचे निर्देश जारी केले.
न्यायालयान सरकाराक येरादारी वेवस्था, रस्तो सुरक्षा आनी धुल्ल प्रदुशण आडावपा खातीर आनी हेर उपाय येवजण्यो चालीक लावन लोकांक कसलोच त्रास जावचो न्हय हाची जतनाय घेवपाचे निर्देश दिल्यात. मजगतीं, ह्या प्रकरणाची फुडली सुनावणी 17 एप्रीलाक दवरल्या. ते आदीं संबंदीत यंत्रणांक कृती अहवाल सादर करपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
