भांगरभूंय | प्रतिनिधी
सगळ्यांत चड फॉलोवर; 4 लाख 66 हजार 248
भांगरभूंय । पिनाक कल्लोळी
पणजीः सध्या गोंयांत लोकसभा वेंचणुकेचें वातावरण पातळपाक लागलां. काँग्रेस पक्षान आपले उमेदवार जाहीर केल्ल्यान प्रचारांतली रंगत वाडल्या. उमेदवार घराघरांनी वचून मतदारांक प्रत्यक्ष मेळपाचो यत्न करतात. अशें आसलें तरीय सध्याच्या डिजिटल युगांत प्रचारा खातीर समाज माध्यमां वा सोशल मिडिया प्लॅटपॉर्माचो वापर लेगीत म्हत्वाचो थारता. सध्याचे परिस्थितींत गोंयांत भाजप आनी ताचे उमेदवार मेळून सोशल मिडियांत आघाडेर आसात.
सध्या गोंयांत भाजप आनी ताच्या दोनूय उमेदवारांचे मेळून 4 लाख 66 हजार 248 फॉलोवर वा लायक आसात. काँग्रेस पक्ष आनी ताचे दोनूय उमेदवार मेळून 4 लाख 31 हजार 664 जाल्यार आरजीपीचे 2 लाख 1 हजार 98 फॉलोवर आसात. ह्या तिनूय पक्षांच्या फक्त उमेदवारांचे फॉलोवर पळयत जाल्यार भाजपाचे उत्तर गोंयचे उमेदवार श्रीपाद नायक फुडें आसात. तांचे ट्विटराचेर 1 लाख 10 हजार, फेसबुकार 83 हजार जाल्यार इंस्टाग्रामाचेर 11 हजार 300 फॉलोवर आसात.
ते उपरांत आरजीचे मुखेली आनी उत्तर गोंयचे उमेदवार मनोज परब हाचो नंबर लागता. ताचे ट्विटराचेर 167, फेसबुकार 50 हजार जाल्यार इंस्टाग्रामाचेर 23 हजार फॉलोवर आसात. काँग्रेसीचे रमाकांत खलप हांचे तिनूय सोशल मिडियाचेर मेळून 19 हजार 967 फॉलोवर आसात.
उत्तर गोंयाचे तुळेंत दक्षीण गोंय मतदारसंघांत सगळ्या पक्षांचे उमेदवार सोशल मिडियाचेर फाटीं आसात. काँग्रेसीचे कॅ. विरियातो फर्नांडीस हांचे तिनूय सोशल मिडियाचेर मेळून 5769, भाजपाची पल्लवी धेंपे हांचे 5748 जाल्यार आरजीच्या रुबर्ट परेरा हांचे 1604 फॉलोवर आसात. सोशल मिडियांत सध्या खूबशे अॅप उबलब्ध आसात. तातूंत फेसबूक, इंस्टाग्राम, ट्विटर, युट्यूब, व्हॉट्स अॅप हे मुखेल अॅप. दरेका अॅपाचेर राजकी पक्षांचे अकावंट वा पेज आसा. तशेंच उमेदवारांचे स्वताचे खाजगी अकावंट वेगळे आसात. अॅपा वरवीं एकाच वेळार लाखांनी लोकां मेरेन पावपाक मेळटा. ताका लागून वेंचणूक काळांत राजकी पक्ष लेगीत सोशल मिडियाचो चडांत चड वापर करतना दिसतात. राजकी पक्ष आपलें टार्गेट ऑडियन्स तशेंच विवीध समाज माध्यमांचे गूण- अवगूण हाचो विचार करून सोशल मिडियाचेर कंटेंट वा आशय तयार करतात.
फेसबुकार काँग्रेसीच चड फॉलोवर
गोंय काँग्रेसीच्या फेसबूक पेजीक सगळ्यांत चड फॉलोवर आसासत. तांचे पेजीक 3 लाख 75 हजार फॉलोवर आसात. भाजपाक 1 लाख 55 हजार जाल्यार आरजीपीचे पेजीक 1 लाख 6 हजार फॉलोवर आसात.
इंस्टाग्रामार मनोज परब फुडें
इंस्टाग्राम ह्या सोशल मिडियाचेर अॅपाचेर मनोज परब आघाडेर आसात. तांचे वट्ट 23 हजार फॉलोवर आसात. तिनूय पक्षां मदीं भाजपाक सगळ्यांत चड 24 हजार 600 इंस्टाग्राम फॉलोवर आसात.
गोंयांतले राजकी पक्ष/ उमेदवार, तांचे फॉलोवर्स
श्रीपाद नायक- ट्विटर 1.10 लाख, इंस्टाग्राम 11,300, फेसबूक 83 हजार
पल्लवी धेंपे- ट्विटर 2873, इंस्टाग्राम 870, फेसबूक 1905
रमाकांत खलप- ट्विटर 167स इंस्टाग्राम 12,800, फेसबूक 7 हजार
विरियातो फर्नांडीस- ट्विटर 632, इंस्टाग्राम 685, फेसबूक 4452
मनोज परब- ट्विटर 1705, इंस्टाग्राम 23स800, फेसबूक 50 हजार
रुबर्ट परेरा- इंस्टाग्राम 204, फेसबूक 1400
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.